《 劇場版 角落小夥伴 魔法繪本裡的新朋友 》治癒感100%！(〃ω〃)
我唔係 角落小夥伴 嘅fans但入到場睇一路都「哇好得意！」咁樣仲開心過隔離啲細路仔(*´꒳`*) / 睇完之後都深深明白 角落小夥伴 點解可以俘虜一眾少女心，因為呢班匿喺角落頭就最舒服嘅一班生物，每一隻都好有萌點、有自己嘅性格，甚至反差萌。
故事講述一眾 角落小夥伴 跌入繪本入面嘅世界，穿梭於各個童話故事之間，認識到新朋友小灰雞，但小灰雞嘅家到底係邊呢？除咗純粹覺得好得意之外，小朋友都可以透過電影睇到唔同童話故仔，唔知依家啲小朋友仲有無睇童話讀物嘅呢…？(sad)
好欣賞美國同日本動畫嘅foley同小細節，令本應好平凡嘅畫面、故事都會多左笑位，至少就算節奏幾慢都好，我作為大人覺得每一幕都好多嘢睇好豐富。粵語版除咗旁白係好好聽嘅廣東話外，因為 角落小夥伴 係啞嘅關係（喂！），所以佢哋嘅對白會用cute cute繁體字係畫面顯示，我覺得無違和感，睇得好舒服。
角落小夥伴 其實就係我哋每個人，雖然唔多唔少…有時候…間中…我哋都會搵個角落頭 — 自己覺得舒服嘅小圈圈入面匿埋，但如果可以好似套戲咁（被迫）踏出舒適圈，就不妨盡情展開冒險！雖然有時去到某個點會淆底、會驚，但最後個結果都會意想不到（咁好/咁差）呢！
入場人士適合女生群體、一家大細為主。男士陪女友我會非常欣賞但希望入得場就頂晒66分鐘佢，唔好訓到打晒鼻寒，你話幾咁尷尬呢。（我聽到隔離行有個佬打鼻寒然後有一吓突然無咗，應該俾佢女友或者老婆鬆咗一踭）
