電影評論

【 MOVIE6 影評 】《 幻愛 》高先三寶中最推薦的一部

《 幻愛 》高先三寶中最推薦的一部

高先三寶之三,終於睇晒三寶!三寶嘅評價大約係: 幻愛 >金都>叔叔。《 幻愛 》無論演員、劇情、攝影皆為上品,但講易入口嘅話會係《金都》,《 幻愛 》題材上沉重少少。電影講述一名精神病康復者追尋愛情嘅故事,對象疑幻似真。到真係遇上愛情嘅時候,又礙於好多嘢而無辦法好好走下去,有時「有問題」嘅,未必只係有精神病嘅一方。

 

 

好欣賞故事同角色設定!編劇非常出色!特別深刻嘅係寫精神病患者會有錄音聽回放呢個習慣,呢個設定好細心,嵌入故仔度都嵌得perfect池!精神病康復者有缺憾,但所謂正常人都會有缺憾(甚至制度都係),都會傷害到人。所以套戲唔係講有精神病幾慘幾慘,而係想帶俾觀眾睇睇男女主角不完美嘅愛情。

 

尾段男女主有一幕高潮戲份,同朋友講起,大家都覺得演得好好。《幻愛》個故仔推進得好好,場高潮戲都令觀眾好投入,出嚟嘅效果自然好好多。

 

 

我覺得香港電影評論學會頒最佳男女演員俾劉俊謙、蔡思韵簡直公道!劉俊謙演有情愛妄想嘅精神病康復者,該正常時正常,該病發時病發(咩形容嚟),甚具爆發力!演出男主對自己病情嘅一股無可奈何。蔡思韵充分掌握女主嘅性情轉變,仲要演埋「欣欣」,我諗新生代演員無乜人挑戰過咁樣嘅角色演出,而出嚟個表現都令人好滿意!希望可以越多越多香港觀眾認識佢,同埋可以有更多擔大旗嘅角色俾佢。

 

至於鮑起靜同潘燦良,基本上唔駛多講,雖然戲份不多,但勝在演咩似咩,真係老戲骨。特別係鮑姐喺《金都》先演完師奶仔,《幻愛》就演專業人士,角色分別好大,但又演得好好。Ush!我無收佣呀但大推大家課金睇呢套港產片!

 

文:sowhatmovie

You Might Also Like