電影熱話

【 MOVIE6 專訪 】《 消失的情人節 》男主角 劉冠廷拍攝後訪談:佢喺我生命中消失咗。

《 消失的情人節 》男主角 劉冠廷拍攝後訪談:佢喺我生命中消失咗。

電影《 消失的情人節 》成為今屆台灣金馬獎大贏家,囊括最佳劇情長片、最佳原著劇本、最佳導演、最佳視覺效果及最佳剪輯五個獎項。於上一屆金馬獎以《 陽光普照 》贏得最佳男配角獎的劉冠廷,今屆憑《 消失的情人節 》首度提名最佳男主角。到底在拍攝《 消失的情人節 》時發生過甚麼趣事?是甚麼東西在劉冠廷的「生命中消失」?

《 消失的情人節 》男主角 劉冠廷 x Hong Kong Movie 專訪

1. 電影有一段戲喺馬路上面,除咗你之外所有人同車都係靜止嘅,拍攝嗰段戲會唔會好困難?

劉:其實呢場戲有好多臨演、又要封路,劇組嘅壓力都好大,同埋我當時都感覺到導演嘅焦慮。所以一直提醒自己唔好被其他嘢影響到,要用心感受角色喺當時嘅狀態,印象都幾深刻。

 

2. 你同李霈瑜在沙灘嗰場戲,霈瑜有好長時間都冇得郁,拍攝時有冇發生啲咩趣事?

劉:因為我係喺沙灘度唯一可以郁嘅人,所以我都一直留意有冇一啲危險物品,好似玻璃碎、垃圾或者有冇沙入到李霈瑜對眼呢啲細節。其中一樣好笑嘅係,因為工作人員會周圍行,將大家嘅腳印掃走,營造一個冇人行過嘅感覺。所以喺沙灘拍戲都真係幾難搞。

 

3. 你哋擺pose影相嗰段好趣怪搞笑,嗰啲動作係咪你諗出嚟?點解會諗到呢啲動作?

劉:拍攝嗰陣大家叫我自己諗幾個動作,咁啱我當時有啲靈感都覺得幾得意,所以最尾諗到例如《創世紀》、《鐵達尼號》嘅經典動作。我覺得最緊要都係享受完成最終畫面嘅過程,喺最尾定格嘅瞬間令到觀眾知道我做緊邊啲動作。可能我細個嗰陣好鍾意睇《超級變變變》,一直都覺得好好玩。

 

4. 你有冇試過為另一半或暗戀對象,默默地做一啲事情或者類似守護對方嘅經歷?

劉:我唔似阿太咁痴情。但之前暗戀人嗰陣,就會諗啲好爛嘅橋令到可以同對方有多啲互動,就算只係打招呼都已經好開心。

 

5. 你遺失過嘅嘢入面,有冇特別深刻或者特別難受嘅嘢?

劉:我細細個嗰陣爺爺有送過一把BB彈玩具槍,只要攞住呢把玩具槍,我就覺得我係世界上最英勇嘅俠客,但呢把玩具槍最尾唔見咗。直到20幾年後嘅今日,我只要係返去老家,我都會搵一次,覺得佢一定喺某一個角落……但我覺得應該係俾人偷咗(笑)。佢就係咁喺我生命中消失咗。

 

6. 現實中你有冇試過寫情書?

劉:我諗大家都會寫情書掛,尤其喺嗰個年代。依家呢個年代大家好少有機會寫信,因為科技發達,大家都有手機。之前寫情書嗰陣會係咁諗到啲好核突嘅字句(笑),但都係好誠摯嘅心情。同埋你收到對方回信嘅時候,都會好自然去感受封信嘅字裡行間、感受對方係用緊咩心情寫落呢啲字句,或者睇下封信有冇「味道」(笑)。所以我覺得情書互相傳遞嘅過程係好有溫度嘅。

(對方收到後有咩反應?)

劉:佢嘅反應都表現喺佢嘅回信入面啦。

(你有冇收過回信?)

劉:有呀。喺國中嗰陣,我哋嗰級有1300幾個人,聖誕節嗰陣,我地班男仔都會鬥收得多聖誕卡,我嗰陣收過80幾張。(問:是第一名嗎?)好似都唔係第一名。

 

文:VN

You Might Also Like