電影熱話

【 MOVIE6 專訪 】《 怪胎 》導演廖明毅、女主角謝欣穎雙雙入圍金馬 專訪大談日常怪僻

《 怪胎 》導演廖明毅、女主角謝欣穎雙雙入圍金馬 專訪大談日常怪僻

觀眾看畢《 怪胎 》後,不難發現電影中很多構圖、鏡頭運用,以及用色都是經過精心設計,可見導演的一絲不荀。戲中男女演員均飾演著其他人眼中的怪人,那現實生活中,女主角謝欣穎的愛情觀又是怎樣?怪僻可能每個人都有,但未必每個人都一樣!到底導演與欣穎私底下又有甚麼怪僻呢?

 

《 怪胎 》導演廖明毅及女主角謝欣穎 x Hong Kong Movie 專訪

1. 恭喜兩位入圍金馬獎最佳女主角同最佳新導演,兩位可以分享入圍感受嗎?

欣穎:相隔十四年,又有機會入圍金馬,所以就好期待又好興奮,感恩。

導演:入到圍幾誇張,因為金馬獎係殿堂級,感覺離我哋好遠。冇諗過呢套戲可以入圍咁多獎。幾感恩的。

 

2. 電影入面主角都係其他人眼中嘅怪人。現實中你哋遇過最奇怪嘅人係點樣?發生咩事?

導演:我哋附近有間書店。有一排每日都去嘅時候,見到有個人面對角落,好似面壁思過咁。然後顧客同店員都唔敢過去打擾佢,佢就咁自己企喺嗰度,冇阻住其他人。每次去都見到佢,冇人知佢做咩。

欣穎:我遇過最奇怪嘅人係一個阿姨,年紀唔係好老,佢踩單車無論去西門町定公館,任何地方佢都會踩住單車唱《阿彌陀佛》。而且佢中氣十足,因為我住四樓,都聽過佢唱,好大聲哈哈。

 

3. 你哋本身自己有冇咩怪僻?或者有咩特質覺得其他人唔會理解/接受?

導演:有段時間好鍾意啲嘢放得好整齊,好唔自然嗰種整齊。依家慢慢變得冇咁嚴重了。但我發現依家有另一個怪癖,就係我投入一件事,會想將件事做到鑽牛角尖。其他人都唔知道我喺度做乜嘢,唔明點解會要求到咁。呢部電影都有反映到,好多畫面都係「要求」出嚟。所以大家先會見到咁有強迫症嘅畫面。

欣穎:我… 只係希望同我食飯嘅人,可以食慢啲。哈哈哈!我真係接受唔到同我一齊食飯嘅人,冇好好去享受個食物。對方食得快,我就會好緊張,但我食得快胃就會唔舒服。其實一直都係咁,但因為呢幾個月不停宣傳《怪胎》,大家一直都問,我先知原來係咁,係身邊嘅人同我講先知。

 

4. 導演今次用iPhone拍攝,比傳統器材有咩優勢?

導演:用iPhone非常輕便,係好明顯嘅好處。然後因為iPhone冇大攝影機嘅高畫質,所以要用其他方法去補返呢個缺失,例如《怪胎》入面我哋會用精準嘅構圖、穩定嘅鏡頭移動,或者顯而易見嘅色彩運用。因為iPhone冇咁高畫質,我哋都需要呢啲去補足缺失。咁樣亦都產生另一種風格,所以都算係用iPhone練功嘅方式。好似畫畫咁,都係用一支鉛筆,但你可以選擇畫簡單嘅線條,都可以畫得好仔細。iPhone咁簡便嘅器材就係睇你點使用佢。

 

5. 呢個劇本嘅靈感嚟自乜嘢?

導演:應該係喺搵緊描述一個,愛情電影比較少有講愛情嘅角度。我想講一個愛情故事,但我唔想講一個佢同佢喺埋一齊,佢一直追佢,然後最後因為一啲事分開。我唔想只係知道佢哋最後有冇喺埋一齊。我想透過一個愛情故事去探索一啲好似每個人談戀愛時都會遇到嘅嘢,但冇乜人討論。
例如,承諾係成日都有的,甚至話佢係一個必經過程。但係「承諾」會導致呢份愛情點發展,或者喺愛情裡面,真係有「換位思考」呢件事嗎?真係做得到嗎?從對方角度諗真係改變到任何事嗎?探討愛情唔同面向係我決定拍呢部電影嘅初衷。

 

6. 謝欣穎今次演嘅角色同以前接拍嘅有咩唔同?最大嘅挑戰係咩?

欣穎:完全冇接過呢類型嘅電影。啲對白係背得非常非常非常熟,係以前冇試過的。以前我拍嘅都係憑感覺去演、去對戲。但今次《怪胎》拍攝嘅節奏都有要求,又必須同林柏宏對戲,我哋兩個節奏要好明確,好緊湊,所以對我嚟講係以前冇嘗試過嘅演法。全部都係寫好,再放感情入去,咁樣係比較難。

 

7. 其實電影係很多情侶嘅寫照,以為終於搵到明自己嘅人,後來另一半卻改變了。如果係你哋,會點做?

導演:好似冇辦法預測呢。如果另一半改變了,你冇辦法強迫佢,按住你想嘅去做啲咩改變。

欣穎:一定會覺得空虛,心諗點解會同以前唔一樣。當然會去討論,改變有可能係對方變好,咁我就覺得係咪我追唔上佢?係咪應該逼自己追到同佢平衡先?如果真係冇辦法,我真係攰了,就會退出。

 

文:Janis H.、VN

You Might Also Like