電影評論

【 MOVIE6 影評 】《 鬼滅之刃 劇場版 無限列車篇 》Fans一定會覺得好滿足

《 鬼滅之刃 劇場版 無限列車篇 》Fans一定會覺得好滿足

《 鬼滅之刃 》fans 一定會覺得好滿足,因為《無限列車篇》結尾收得好靚,好淒美,好壯烈,ufotable 嘅作畫始終如一令人驚艷。之不過,礙於《無限列車篇》其實只係《 鬼滅之刃 》完整故事裡面其中一個過度嘅篇章,而唔係原創獨立外傳作品嘅關係,無睇過漫畫/電視動畫嘅觀眾未必可以搵得到角色情緒起伏嘅主因以及劇情轉捩點嘅重要性,亦令到劇場版兩個鐘嘅主線劇情有起有落,善逸、禰豆子嘅發揮被限制,主要 side kick 伊之助算係叫做多少少出場機會。

 

一開始係炭治郎嘅心理掙扎

承接電視動畫第一季結尾,炭治郎、善逸、伊之助登上無限列車,匯合炎柱煉獄杏壽郎進行滅鬼同埋保護列車乘客嘅任務。《鬼滅之刃劇場版 無限列車篇》一開始嘅劇情推進比較慢,主角一行人同炎柱嘅互動只係閒話家常,敵人「下弦之壹」魘夢初時展開攻擊嘅過程亦未掀起高潮,直至炭治郎進入夢境開始終於有起色。炭治郎一向對於屋企被滅門一事耿耿於懷,今次佢有大量情感可以爆發,令人特別感動,同時覺得佢脫離夢境嘅方法一絕,殘酷卻又合乎情理。

 

跟住突然變咗做炎柱嘅故事

嚟到劇場版下半部,劇情基本上係以炎柱為中心。炎柱一口氣使出炎之呼吸唔同型態嘅絕技,幕幕都係高潮。因為上半部有關炎柱嘅背景故事比較單簿,所以下半部焦點去咗炎柱嗰度,無可否認係有啲突兀,但 overall 勝在打得夠精彩,配樂、音效激昂,炎柱呢個角色有勇者無懼嘅王道威能,超級有型,超級熱血。即使佢嘅故事來去匆匆,都慶幸最後只係用咗三言兩語就做到賺人熱淚嘅效果。

 

其實兩個部分主題相通

表面睇,《無限列車篇》上下兩部分係方向完全唔同嘅故事,炭治郎有炭治郎個人嘅掙扎,炎柱有炎柱自己嘅經歷,不過諗深一層,原來兩部分嘅主題互通,都係講「保護」:唔只要保護身邊嘅親友,更加要行使大愛、正義,保護所有人。炭治郎之前因為無辦法保護屋企人而感到愧疚多時,而當佢終於可以釋懷嘅時候,竟然又迎來另一個沉重嘅打擊。炎柱絕對係炭治郎嘅 role model,佢嘅為人宗旨一定會影響炭治郎往後嘅表現。相信無睇過原著嘅觀眾都可以從中體會得到炎柱無私嘅精神,然後流下眼淚。

 

可惜敵人無背景故事

《鬼滅之刃劇場版 無限列車篇》可以話係《鬼滅之刃》整體故事裡面嘅一個重要里程碑。《無限列車篇》有啲難被視作為一部獨立作品,因為《無限列車篇》同前前後後嘅劇情都有關聯,入場前在所難免係要做啲功課。劇場版做得唔錯嘅地方有好多,但係不足之處都特別明顯,例如敵人魘夢根本無屬於自己嘅角色發展,佢嘅存在就只係為咗作惡,毫無意義;至於另一位敵人嘅出場同退場更加係離奇。我知道原著裡面有解釋點解佢當時會在場,不過,至少都應該喺劇場版裡面輕輕交代一下,有返啲前因後果,感覺應該會好好多。

 

文:靈光

You Might Also Like