電影熱話

【 MOVIE6 熱話 】有錢有場有器材 故事最緊要貼地有共鳴! 一丁目 用短片講最真實香港

有錢有場有器材 故事最緊要貼地有共鳴! 一丁目 用短片講最真實香港

香港地,創作人最怕冇地方「大展拳腳」,將作品展示俾更多觀眾。近期就冒起咗香港本土嘅短片平台: 一丁目,除咗免費開放俾觀眾欣賞,仲提供不同資源俾滿懷熱誠嘅創作人,題材不拘更見諷刺時弊嘅出色故事。以下訪問到一丁目「鐵三角」:歐文傑(歐)、伍嘉良(良)、伍奇偉(偉),分享招募短片嘅準則以至將來嘅願景。

Q: 點解會叫一個咁日本嘅名「一丁目」?

歐:因為我哋平台係主打短片,可以好快咁睇,「一丁目」本身字面上都有望一眼嘅意思。另一樣嘢就係我哋最初希望可以聚到一班創作人,你頭先都講呢個名都好日本啦,日本就係咁分區: 一丁目、二丁目、三丁目等等,一丁目就係最中心個位,亦係最繁華個位。而我哋都係壹傳媒旗下,「壹」同「一」都有關聯。

 

Q: 請分享下三位喺一丁目嘅角色。

良:歐文杰係總監,咁開始嘅時候就搵咗我同伍奇偉,主要幫手搵創作人。

(行內人仕你哋都應該有聯絡方法,但用咩途徑搵新人?)

良:主要係睇一啲作品、學生作品,覺得好就會人搭人搵佢,有啲都係人介紹,每次都會逐個見、逐個傾。

歐:或者去啲大專院校:APA、OU、BU,聯絡啲老師推薦學生俾我哋。我都有喺大專教書,都有同學生講呢個平台可以試下。當然我哋都吃力,睇下邊啲真係有心去做。仲有喺啲各大比賽、短片節,我哋都會去物色有冇一啲「被睇漏眼」嘅人才。

偉:我有少少補充,由其係《逃犯條例三部曲》之後,依家開咗台,自豪啲講我覺得香港嘅大專或者會拍故仔嘅人,應該都識我哋(一丁目)。我覺得爭在搵佢哋出嚟,我哋彼此認識大家。但依家佢哋會覺得有個好故仔先搵我哋,先問我哋攞Budget、先拍出嚟……

歐:佢哋誤會咗,以為我哋要寫得好詳細。你都知坊間好多比賽、機構,都係要你過五關斬六將,我哋唔係咁。簡單一個故事大綱俾我哋睇,再慢慢傾,加埋可能本身有拍攝經驗、Portfolio,就係咁簡單,好快。

偉:或者佢哋會糾結喺生活,要返工、未抽到時間。

 

Q: 三位揀短片嘅時候有咩準則?

歐:好。好睇

(點先叫好睇?)

歐:要貼地,起碼我要覺得關我事,或者關香港人事。如果係一個唔關香港人事嘅故仔,可能關於北方、西方咁,我覺得冇乜必要揀。同我哋有關、有共鳴嘅、make sense嘅,我哋都OK㗎喇。

良:其實好主觀,而且好輕鬆,Whatsapp send故事嚟得㗎喇,唔洗見面㗎。我仲叫佢哋唔好send咁多添。但確實有啲情況係磨咗好耐,最後都冇拍到。因為都有主觀成分,有時個情況係去到有啲嘢真係唔通喎,我哋都會批評。當然都有啲係一覺得掂就可以去(拍攝)。

偉:《物是人非》我覺得好好,未推出嘅,片名未必好吸引,佢係講香港唔記得幾多年後嘅國慶,到時啲人變成點呢?唔知你覺得點。

(我覺得有趣嘅。)

歐:咁咪得囉!就拍得㗎喇!有樣嘢唔係標準,係創作嘅根本:Research。頭先講有啲故事唔得,就係佢可能想寫樣嘢出嚟,但冇Research,係憑空想像,得自己先feel到,其他人feel唔到。咁我哋就會覺得呢個媒介未必啱。頭先提到行得好快嘅故仔,通常係有好Solid嘅Research。例如有個同事嚟緊有作品就快出,係真人真事: 有次佢去杜汶澤Talk Show影咗張合照,跟住過關返大陸,被人扣留咗十幾日。(十幾日?!)係啊,逼佢講同杜汶澤係咩關係,點解會有呢張合照,佢係咪港獨主教乜乜乜,係荒謬到問佢「你認唔認有人收錢去遊行?」,逼到最後自己要認有收錢去遊行,逼到自己最後要講「杜汶澤就係港獨之父」喇,咁先放佢走。所以創作同生活有關嘅會易行囉。

 

Q:除咗錢同三位嘅專業意見,一丁目仲會提供咩支援?

歐:器材、地方都有支援。我哋都屬於壹傳媒集團,可以用到佢嘅大樓,可以有好多Office景,我哋都搭咗個好迷你嘅屋企景,泳池、Gym、酒樓、食肆都扮到。什至我哋嘅拍攝隊伍都支援。

良:傾Sponsorship都試過,例如有個傾Uber,我哋都會做埋呢啲嘢。

 

Q:除咗拍攝短片,動畫短片製作有咩支援?

歐:錢,哈哈哈

偉:台灣蘋果本身有動畫部。動新聞係有動畫㗎嘛。

歐:但新聞講緊係一日就要做好。有啲故事如果我哋覺得合適嘅,我哋都會試下做,未必可以做到好fine,但我哋都試過將漫畫變成動畫,例如《夾餅妹日記》。除咗將佢變成郁之外,音效、配音、音樂都要處理,呢啲方面我哋都有提供資源。

良:有啲完成咗嘅作品如果想多啲人睇到,我哋個平台會唔會幫到你呢?又或者一啲想開展嘅作品,我哋有冇資源可以提供到俾你呢?呢方面係可以一直去搵合作。

偉:我哋3個嘅背景本身都有啲局限,知道拍片有燈、錄、拍,點樣搞好套戲、角色,反而動畫真係要諗下。始終台灣都離遠咗我哋。我自己就好期待本地學生、新手嘅作品。都唔係好清楚點幫到佢哋,因為覺得佢哋要畫好耐。

歐:所以我都同過盧子英 盧Sir,會Keep住做大師班,講下啲動畫系列。除咗佢講點做動畫,都要有個討論嘅氣氛。希望喺呢啲位會幫到。同埋如果我哋結合到好多唔同嘅創作者,我哋會唔會促成到交流呢?

 

Q:依家有咁多睇片平台(YouTube, Netflix etc.),你哋覺得一丁目最大嘅特色係咩?

歐:YouTube係公海,標題性主導,Netflix內容好全球性,本土唔係咁多,我哋想呢個係集中俾香港人嘅短片平台。首要係無論社會議題定飲食娛樂,都想引發到香港人嘅共鳴。頭先有個外國記者都話一丁目,係可以代表香港嘅平台,睇到咩叫香港人。呢啲都係Netflix定YouTube都做唔到嘅嘢。

良:我覺得我哋都傾向多少少「作品」,再短都好都係一部作品。YouTube拆扭蛋都可以係一條片,但我唔可以叫佢做作品。嗰啲都有幾百萬view㗎嘛,我哋又唔係追求嗰啲嘢。而接觸本地創作人都係呢個平台嘅重點。我哋盡量「創作自由」,冇自我審查,講乜都得,即管發聲。

 

鳴謝:場地 M zone 親和藝術

文:Janis H.

 

 

You Might Also Like