電影評論

【 MOVIE6 影評 】《 TENET天能 》唯我獨尊嘅Nolan

《 TENET天能 》唯我獨尊嘅Nolan

無呃你,我Physics 好渣,但係我第一次睇《 TENET天能 》就明咗80%,真㗎,事後睇解說,證實我嘅思考方向正確!我覺得觀眾要緊記,一早講到明《 TENET天能 》唔係單純嘅 time travel,而係 time inversion,總而言之電影裡面嘅角色唔可以由一個地點或者空間突然跳去另一個唔連接嘅地點或者空間(即係唔可以好似《Endgame》咁 bomb 一聲由2023年跳咗去2012年咁樣)。唔明淨低嗰20%(而家明晒),係因為成部戲都好急,睇同聽唔切對白,miss 咗唔少 key evidence,《 TENET天能 》確實係一部幾 challenging 嘅電影。

 

唯我獨尊嘅Nolan

咁啱我睇得明啫,Christopher Nolan 有無搵方法意圖或企圖照顧觀眾嘅觀影體驗都係一個問題。《TENET天能》有 Christopher Nolan 一貫強烈嘅風格,今次講故仔嘅佈局亦有啲似《潛行凶間》。你話《潛行凶間》難唔難明?都難㗎,但係節奏無咁急,資訊又比較完整(起碼個故事一開始就解釋得好清楚,係由一層夢去另一層夢,你最多唔知去到邊一層夢㗎啫)。至於《TENET天能》,科學術語好難,透過對白交代嘅資訊又唔多,劇情同劇情之間又有幾個斷點,觀眾或者要去到電影中段先至會 get 到,「哦,原來咁樣就係 time inversion⋯⋯」雖然大部分觀眾都好似預咗要畀《TENET天能》「迷魂」,亦都好似只有 Christopher Nolan 拍呢啲高深莫測嘅 sci-fi 電影觀眾先至會 buy,不過喺 storytelling 呢一個層面之上,假如一部電影演繹得太高深嘅話,對觀影體驗始終會有少少影響(例如因為諗唔明,一直諗,諗極都唔明,然後諗到出咗竅)。

 

SATORAREPOTENETOPERAROTAS

玩咗咁多次時間同空間,都仲畀 Christopher Nolan 諗到有新玩法,而且每一次都有勁多一環扣一環嘅細節,激發觀眾討論,真係甘拜下風。我覺得講未知科技或者超現實理論嘅電影去到結局嘅時候,要用返「科學」去證明劇情係「合理」先至叫做成功,而唔係用「愛」嚟戰勝一切(笑)。《TENET天能》合乎我嘅期望,雖然一開始我的確係一頭霧水,但係劇情方向貫徹始終,結局有「砌圖砌好咗」嘅圓滿(如果你到完場都唔知點解角色會反轉再反轉,咁就另作別論⋯⋯)。

 

特效唔使講梗係一流啦

《TENET天能》嘅 time inversion 特效唔係《潛行凶間》嗰一隻魔幻,sci-fi 味道比較重。經常被傳媒報導嘅「炸飛機」其實唔係特別 impressive,反而見到有好多人同時向前或向後嘅畫面,我真心覺得犀利。都見有人話《TENET天能》嘅音效好似大聲咗少少,咦,我以為係 IMAX 個音響特別勁咋。

 

遲嚟嘅眼淚

係,《TENET天能》有聲畫嘅觀能刺激,不過就少咗一啲情感,大部分角色都係以完成任務為前題,不斷衝衝衝,比較少有情感上嘅交流。其實《TENET天能》係有一個幾令人感動嘅人物關係㗎,不過礙於劇情發展,要去到最後一刻先至被正式揭曉,同時證明 Christopher Nolan 寫呢個故事嘅時候真係癲咗,咁複雜嘅理論都可以畀佢玩得出神入化。

 

好似係無劇透不過最好睇咗戲之後先睇以下呢一段啦除非你好奇心好大

最後解釋返點解我會睇得明,因為上年研究《Endgame》time travel 嘅時候對「祖父悖論 Grandfather Paradox」已經好熟悉,同埋我一開始就認定《TENET天能》係行緊「linear」嘅敘事手法,無時空交錯,而且,所有事件,「發生咗嘅已經發生咗」,所以電影裡面嘅角色一直都係見證緊或者體驗緊「已經發生咗嘅事」,「祖父悖論」依然只係一個悖論,證實唔到「過去嘅自己」可唔可以阻止「未來嘅自己」改變「未來嘅自己嘅過去」,一切一切都係一個理論上可行但係無辦法被驗證嘅循環。即係好似畫一條唔斷開嘅線,喺某一點 U-turn,喺另一點再 U-turn,如此類推,直至鬆開手嘅最後一刻,所以喺同一個時間點之上有機會出現多過一個或以上嘅自己(最初嘅自己、被逆轉嘅自己、逆轉後再逆轉嘅自己⋯⋯),就係咁,(好似)都唔係好複雜啫?

 

文:靈光

You Might Also Like