電影評論

【 MOVIE6 影評 】《 最後的情書 》可是那然後呢

《 最後的情書 》可是那然後呢

無睇過《你好,之華》,問朋友《你好,之華》/《 最後的情書 》有無好重要會影響到劇情嘅轉變,答案係無嘅,不過風味真係比較唔一樣,岩井俊二拍《 最後的情書 》比較得心應手(日本人喺語言同情感表達嘅思路始終係別樹一格)。點解我想睇《 最後的情書 》,最原始嘅衝動,係想了解庵野秀明嘅演技有無進步(笑)。睇完之後,感受分明,一開始輕鬆愉快,中間有少少壓力,而最後,有感動,有圓滿,亦都有暗湧。

 

三位一體

《 最後的情書 》故事分別以「妹妹」(松隆子)、「前男友」(福山雅治)同埋「女兒」(廣瀨鈴)三個角色唔同嘅角度,拼湊「女主角」遠野未咲生前(特別係佢高中畢業前)嘅片段。其實關於遠野未咲呢個人物,觀眾可以獲得嘅資訊唔多,亦都唔太完整,但係變相多咗好多想像空間,而且比例拿捏得唔錯,我自己就幾中意呢個若有若無嘅感覺,畢竟回憶都係咁,有朦朧之美(當然都有好多醜八怪嘅時候)。所以《最後的情書》主要係睇「妹妹」懷愐中學時代暗戀學長嘅青澀、「前男友」多年嚟未能放棄咲生嘅鬱結以及「女兒」借媽媽短暫嘅人生領悟生存哲理,三個部分,三種唔同嘅氣氛,三種截然不同嘅反思。

 

老生常談

《 最後的情書 》算係日本電影之中節奏同情緒都掌控得幾啱香港觀眾口味嘅一部作品,唔會過分矯情同做作。第一次篤中我嘅喊穴,就係「前男友」第一次寫情書畀「女主角」嘅嗰一個 moment,之後嘅感動位就集中喺結尾。美中不足之處係當 point of view 由松隆子變咗做福山雅治之後,劇情變得有少少累贅,令到我有「松隆子呢?想見返松隆子」嘅感覺。人到中年拼湊高中生時代回憶呢一類型嘅故事太常見,所以唔容易拍,要觀眾覺得啱 feel 都幾講天時地利人和,而《 最後的情書 》係幾成功嘅一次(再)嘗試。如果觀眾有睇過《你好,之華》,有比較之下,可能會得出另一啲想法,我就無法評論。

 

可是那然後呢

松隆子同福山雅治等等都係好戲之人,年輕演員方面森七菜嘅表現都唔錯,不過喺《最後的情書》裡面令我真心覺得耀眼嘅係廣瀨玲。廣瀨玲演技越嚟越成熟,雖然都仲停留喺飾演高中生嘅階段,不過亦都開始睇到佢有成熟嘅韻味。至於飾演福山雅治年輕版嘅神木隆之介,嗯嗯,繼續努力⋯⋯庵野呢?驚喜地係有莫名嘅喜感,幾 fit 佢個角色,不過,而家只要我一見到庵野,我嘅腦裡面就只係得「究竟幾時先可以睇到《EVA》最後一集」呢一句說話(哭)。同一時間,我一直諗起梁靜茹嘅《情歌》,好感觸,《最後的情書》嘅後座力對我嚟講都幾大。

 

文:靈光

You Might Also Like