《 劇場版紫羅蘭永恆花園 》劇本寫得出色
今年4月，睇咗《紫羅蘭永恆花園》外傳電影，發覺唔可以唔睇埋電視動畫，所以，為咗睇結局篇嘅時候會有更深刻嘅體會，決定事先好好投入《紫羅蘭永恆花園》嘅故事世界。女主角薇爾莉特喺電視動畫學會「愛」為何物之後，終於喺結局篇將「愛」學以致用。《 劇場版紫羅蘭永恆花園 》製作質素極佳，情感細膩，有好多眼淚，有好多揮之不去嘅思念。一口氣睇晒電視動畫加結局篇電影，真係幾唔捨得⋯⋯
劇本寫得出色
《 劇場版紫羅蘭永恆花園 》故事推進出色，除咗喺電影故事範圍以內做到環環相扣之外，亦扣得住電視動畫嘅內容。電視動畫有某幾集被公認為係特別催淚，估唔到今次電影一開場就係借其中一集嘅內容嚟做引子，令眼淺嘅我喺心裡面不禁嘩咗一聲。《劇場版紫羅蘭永恆花園》嘅主旨鮮明：「哪怕科技點樣進步，哪怕自動手記人偶服務會漸漸被淘汰，假如，因為種種原因而開唔到口嘅話，寫信永遠都係最佳嘅表達心意方式。」係，新科技會淘汰舊有嘅通信媒體，但係人與人之間渴望互相理解嘅心係最原始嘅。薇爾莉特喺佢尋找少佐之旅嘅期間成長得好快，情感越嚟越豐富同人性化，處事手法亦都越嚟越成熟。作為主角，佢嘅人生故事相當圓滿。
對少佐嘅幻想幾乎幻滅
雖然電影海報上都有少佐嘅身影，但係為咗無睇過原著嘅觀眾，就唔講薇爾莉特最尾到底有無同少佐再遇。不過可以講嘅就係，《 劇場版紫羅蘭永恆花園 》令少佐呢個角色被扣唔少分數。喺電視動畫裡面，少佐好夢幻，猶如被塑造成為一個神聖不可侵犯嘅偶象；今次少佐可能會畀到觀眾一啲負面嘅感覺，並唔係指少佐係一個衰人，而係，當觀眾同薇爾莉特站响同一條線上面嘅時候，就算能夠理解面前所發生嘅一切，都一定堅嬲，嬲少佐呢個人原來都只不過係一個________（四字成語）。
唔只50封信嘅眼淚
薇爾莉特喺出發尋找少佐之前，接咗一件為患病小孩代筆嘅差事。朋友聽到有觀眾形容今次「仲喊得勁過電視動畫，已經去到核彈級」。雖然呢件日常差事只係用嚟襯托薇爾莉特同少佐之間嘅主線劇情，但係令觀眾爆喊嘅觸發點其實更多。（喺戲院忍眼淚忍得好辛苦驚嚇親四周圍嘅觀眾）到最後，終於要見證薇爾莉特嘅結局嗰陣，反而又唔係好喊得出，一嚟可能已經無晒懸念，二嚟，心諗：「做乜仲企响度啊！」仲未嬲完。
京都動畫誠意之作
有睇過電視動畫又好，無睇過又好，《 劇場版紫羅蘭永恆花園 》裡面有海枯石爛嘅愛情，亦都有血濃於水嘅親情，總可以 hit 得中淚腺，幕幕真情流露，對白非常自然，配音同作畫都保持喺高水準，格局絕對拍得上一流嘅真人劇情電影。男女主角嘅結局或者不似預期，亦唔怕講有啲扭扭擰擰嘅感覺，但係絕對唔係劇本之過，我反而覺得咁樣真實反映到薇爾莉特同少佐一直以嚟都好抑壓，對我嚟講，有好多難以形容（講唔出口）嘅共鳴。感謝京阿尼將最後嘅思念送畀每一位中意《紫羅蘭永恆花園》嘅觀眾。京阿尼，繼續加油。
文：靈光
