電影評論

【 MOVIE6 影評 】《 冥通銀行特約:翻生爭霸戰 》久違的港產天馬行空!

《 冥通銀行特約:翻生爭霸戰 》久違的港產天馬行空!

欣賞有人肯投資拍呢類鬼靈精怪題材(例如近年嘅《救殭清道夫》),擴闊返香港電影嘅戲路,只可惜明顯哋無budget。望就望《 冥通銀行特約:翻生爭霸戰 》回到本,可以日後有投資肯繼續泵水落去拍。

 

 

故事講黃又南誤打誤撞死咗,落到地府又焗住參加地府獨家綜藝節目「翻生爭霸戰」,撼贏惡鬼就可以還陽人間。通靈少女蘇麗珊願意幫助一碌葛咁嘅黃又南,除咗感情升溫之外,仲解開一個個謎團…

 

 

有一樣嘢我覺得好浪費嘅係,套戲出咗好多人物,而人物之間啲線全部都好輕描淡寫。但其實父女情、愛情、友情線全部都好有發展空間,到最後feel到佢想有啲感動位,但因為無一條線寫得入肉,觀眾真係好難投入到。呢類寫陽間陰間嘅戲,最入門級、最易令人喊嘅,一定係親情,再加埋有Ben哥袁富華加持,真係好想呢條線寫多啲寫好啲!

 

 

佢用咗好多對香港觀眾嚟講比較生面口嘅人/配角,想做到好生鬼、好新鮮嘅感覺,呢個係個好好嘅嘗試。睇港產片淨係睇大星睇到想嘔,無錯係演技有貨交,但如果港產片肯發掘新演員出嚟其實更加難能可貴,唔試又點知後生仔得唔得呢~(但蘇麗珊觀眾緣真係好差,身邊一堆人話唔鍾意睇佢)

*全場最佳配角:紙紮舖老闆
*全場最佳植入(直入)式廣告:Carousell
個廣告堅係痴線😂

 

文:sowhatmovie

You Might Also Like