電影評論

【 MOVIE6 影評 】《 整容液 》媒介影響氣氛

《 整容液 》媒介影響氣氛

睇完《 整容液 》動畫版電影,五味雜陳,覺得劇情上/視覺上/氣氛上都無乜衝擊,甚至乎覺得唔係咁好睇。諗咗好耐,究竟係個故事出錯,抑或係動畫呢一個媒介出錯?套返同一個故事落去漫畫,以睇定格畫面嘅閱讀模式,加上令人不安嘅畫風,畀到讀者好多想像嘅空間,話唔定漫畫版《整容液》真係有如一眾網民所講,好正、好黑暗、好得人驚,只可惜今次動畫版電影畀唔到我以上嘅感覺。

 

故事VS動畫

齋講故事,《 整容液 》到底係咩 feel?獵奇、前衛、概念亦都好特別,仲有好多對於整容、對於韓國娛樂圈嘅嘲諷。都係嗰句,能夠令觀眾有反思,唔代表作品一定會係好睇,唔應該將呢兩件事掛鉤。《整容液》的確係幾有話題性,亦都有令人值得深思嘅劇情,之但係,假如製作團隊係因為擔心拍真人電影拍唔出漫畫原有嘅味道,所以選擇製作動畫電影嘅話,我就認為今次嘅製成品有好多地方都未如理想。

 

媒介影響氣氛

或者有部分觀眾會唔 buy《 整容液 》嘅畫風。我覺得畫風問題唔大,反而各種動作生硬嘅畫面同埋用力過度嘅配音先至令我最難過。另外,所有角色都好似好趕時間,動作勁急,連帶劇情過場一樣都係好趕急,直頭係急過《天能》。動畫電影嘅創作力量同幻想理應可以比真人電影更強,好不幸《整容液》真係撻我唔著,留畀我嘅心理陰影面積近乎係零。

 

結局係

完場,同朋友討論《 整容液 》,主要都係圍繞結局發生嘅一切究竟合唔合乎科學(雖然整容液嘅存在本身就唔科學),同埋,《火影忍者》,明嘅⋯⋯就會明。

 

文:靈光

You Might Also Like