《 不死軍團 》想幾時死都唔到你話事！
首先我覺得《 不死軍團 》中文戲名改得不夠貼題，佢哋唔係一隊「軍隊」或者「軍團」，鎗火炮彈亦都唔係呢套戲嘅重點，所以唔好一心想睇啲震撼嘅大規模激戰場面而走去睇。
佢哋係得幾丁友嘅秘密小隊，唔知點解每隔一段時間（數以世紀去計），呢個世界就會誕生一個點整佢都唔會死嘅人，然後佢哋會聚集埋一齊，由佢哋之中最老嘅一位 － Andy（Charlize Theron）帶領底下去進行一啲不為人知嘅任務。呢個咁驚世嘅天賦，你估俾人發現咗會點？無錯，總有啲陷＿鏟想拎嚟做壞事，想將佢哋一網打盡，進行會令佢哋生不如死嘅研究。喺呢段非常時期，「新生兒」Nile 誕生……
電影時長兩小時，節奏略慢，但劇情尚算豐富。雖然劇情唔難估到，但我會想睇角色之間關係、性情上有咩轉變，所以一路睇落去都無pause嘅衝動。動作場面離不開，但期望值大家可以降低返少少，反正佢嘅定位睇落都唔係完完全全嘅動作娛樂大片，即係同Netflix《鬼影特攻：以暴制暴》性質唔同。
觀眾由一個新生兒嘅角度去瞭解呢班人，佢哋會話你知當初經歷過嘅嘢，大家嘅簡單背景之類，觀眾亦都跟住呢位新生兒慢慢成長，對「 不死軍團 」嘅觀感都會慢慢轉變。呢班「死老嘢」唔會企係高地去教訓呢個新仔，反而真係當佢好似屋企人咁樣，性格非常討人喜歡，呢樣嘢唔知點解睇到我有少少感動，感動角色嘅設定唔係啲傳統老土嘢。
死亡唔係你同我或者戲入面嘅角色可以主宰到，最後發現原來咩生命都會有完結嘅一日，個腦會諗緊啲咩？會反而努力咁去求生？定話終於都等到呢一日可以了結一切呢？班角色每一個腦入面都應該有唔同嘅答案。
最後尾舖咗條伏線，而呢條伏線正正就關於我睇完套戲好想知嘅嘢！所以如果佢出第二集我都一定會追。今集大佬Andy同新仔Nile嘅篇幅比較多，希望團隊其他三位成員下次可以重啲戲份，同埋Andy要保重，希望下集都有佢。
