UA Megabox 翻新重開 話你知四大特色影廳

斥資八位數字裝修嘅 UA Megabox 現已重新開幕，並將於8月31日舉行開幕儀式，於 IMAX 影廳首映 Marvel 全新超級英雄劇集《 異人族 》。作為全港第一間擁有 IMAX 影廳嘅戲院，UA Megabox 亦都係全港第一間翻新並且 upgrade IMAX 設備嘅 IMAX 戲院！

中港台第一間升級 IMAX 影廳

目前只有去 UA Megabox 先可以體驗到升級版 IMAX Immersive 12 聲道圍繞音響效果，聲音無經過壓縮，而且重新安裝嘅 IMAX 巨型銀幕亦都係 UA 院線內最大，可以話係睇 IMAX 電影最高級嘅享受。F至J行嘅位置被稱為「皇帝位」，醒目嘅你買飛嘅時候肯定識點揀位！

全院 D-Box 影廳

翻新後嘅 UA Megabox 擁有全港第一間全院配備獨立 D-Box 座位嘅影廳，座位適合亞洲人身形，而且震動效果可以獨立調校，唔會一郁就郁晒成行嘅座位。D到F行嘅觀影體驗最好！

全新 Dolby Atoms 影廳

UA Megabox 新設兩個全新嘅杜比全景聲 Dolby Atmos 影廳，喇叭遍佈全院，總共有34至36個聲道，係一般影廳嘅四至六倍，音效非常細緻。透過精準嘅物件導向，觀眾可以知道物件由邊個角度飛入或者飛出畫面。杜比全景聲 Dolby Atmos 影廳配備4K Laser 投映機，務求畀觀眾最佳嘅聲畫享受。G到I行嘅觀影體驗最好！

貴賓廳 Oscars Club

將會主力播放歷屆奧斯卡猛片嘅 Oscars Club 影廳有52個情侶座位，購買「Oscar Combo」就已經包戲飛+嘢飲+爆谷。如果喺 Oscars Club包場，可以訂埋由 MADISON’S 餐廳主理嘅四款精選主菜+紅白 signature drinks。喺 UA Megabox 旁邊嘅 MADISON’S 餐廳亦即將開幕。

UA 院線最快下年會喺青衣同深水埗開設新戲院，到時再為大家報導，而家就率先去 UA Megabox 買張戲飛體驗吓啦！

 

文：靈光

https://www.facebook.com/huxtin/

靈光一閃，正在尋找《光影星碎》後的《生死幻願》。