《 屍殺半島 》令我諗起最後生還者PartII
實在唔怕講，《 屍殺半島 》「同第一集差好遠」嘅評價一早就喺網絡上湧現，香港嘅觀眾都應該有晒心理準備，至於「好遠係幾遠」，好睇你對上集《屍殺列車》嘅感覺。假如《屍殺列車》喺你心目中係一部「神作」，咁，《 屍殺半島 》都幾大鑊。又唔使驚住，我覺得《 屍殺半島 》只係畀《屍殺列車》嘅包袱壓住咗啫。拎開個包袱，《 屍殺半島 》都尚算可以令人接受嘅，當一般 popcorn 動作片嚟睇嘅話。
上集做得好嘅地方喺邊度
《屍殺列車》好睇，好睇在故事扣人心弦。唔似得一般美式喪屍電影以衝鋒陷陣打喪屍為故事主線，著眼於打打殺殺同噴血噴得有幾咁精彩，《屍殺列車》係借幾位主角喺列車上一個咁狹窄嘅環境下求生嘅故事，刻劃人情冷暖，有好多比血肉橫飛嘅廝殺更令人衝擊嘅畫面。《屍殺列車》製作上的確唔夠完善，但贏劇情鋪排，贏氣氛，對於一部電影嚟講，好重要。
今集做得唔好嘅地方係邊度
《屍殺半島》，調返轉，budget 多咗，故事focus 轉咗，導演想講嘅 message 唔同咗（話上一集太絕望，所以今次要多返啲希望），本來都有 potential 可以拍得好好睇；結果，故事規模越大，場景空間越大，劇情反而變得乏味，好想拍一部「猛片」，偏偏唔夠「猛」。《屍殺列車》孔劉、馬東石等等令觀眾有共鳴，相反《屍殺半島》姜棟元、李貞賢同觀眾嘅距離有啲遙遠。男女主角冷面特工上身，槍法如神，但係就未能夠做到有血又有肉嘅感覺，同好多動作片只係得個打字嘅主角無咩分別。劇情上多次想表現出佢哋兩個都有脆弱嘅一面（主要係為咗親情），不過似乎計算得太過精準，公式化劇情鋪排得太過明顯。亦都唔可以唔提，角色與角色之間嘅互動欠缺張力，人類反派有頭威無尾陣，而男女主角喺故事裡面有一個明明好重要嘅「淵源」，可惜無被發展成為「衝突」（當然唔係講打交個一款衝突啦），錯失咗一個可以令男女主角真真正正有意義咁去互動嘅良機。
特效有進步定係退步
《屍殺列車》印象令我最深刻嘅竟然係一開始身體勁柔軟嘅嗰一隻馬（咦，sorry，係鹿啊），翻身嘅動作做得勁靚（唔係講笑，我係真心 impressed），不過另有一幕爆玻璃跌喪屍又假得令我打咗個突。上一集無乜需要用CG，今集《屍殺半島》，重點變咗追逐戰、槍戰，用 CG 嘅頻率高咗（亦都幾高），特效應用嘅好與壞變得更加明顯，例如飛車狂撞喪屍嘅畫面，喪屍唔係血肉模糊，而係，真係有啲模糊。其實韓國電影人處理 CG 嘅技巧係越嚟越好㗎，不過可能去到某啲突破唔到荷里活水平嘅關口，只好用掩眼法去解決問題，咁樣就難逃資深觀眾嘅法眼啦。
令我諗起最後生還者PartII
《屍殺半島》唔可以話係難睇，亦都無令我反感，所有嘢都係中規中矩，只不過缺點比較明顯，結局有啲「出事」（劇情同對白太刻意、情感太浮誇、某個演員嘅演技太⋯⋯出位，氣氛令人難以言喻），然後再畀上一集《屍殺列車》廣泛嘅贊譽拖累，一切一切都無辦法唔令我聯想起《The Last of Us Part II》。一部係電影，一隻係遊戲，兩個末世故事作品都係期待值勁高嘅續集，除咗喪屍/感染者都已經淪為「識郁嘅佈景」之外，亦都因為編導想作出一啲「新嘗試」而弄巧反拙。好彩嘅係，《屍殺半島》劇情上無乜爭議，輸都只係輸「做得唔夠好」而唔係「不知所謂」。
文：靈光
