《 捉妖記 2 》引發「Vivienne Tam 2018春夏系列」登陸時裝周 陳法拉捧場兼請胡巴睇音樂劇
白百何、井柏然、吳君如等於2015年合演的奇幻喜劇《 捉妖記 》票房大賣兼引發全城熱潮，戲中主角小妖王胡巴一炮而紅，而加入梁朝偉令大家極期待的《 捉妖記 2 》，亦已拍板於2018年農曆新年慶歲檔上映，陪觀眾開心過新年。不過胡巴近日已急不及待要跟大家見面，昨日（9月10日）他便飛到了紐約時裝周做模特兒行catwalk，因為著名華裔時裝設計師Vivienne Tam的2018春夏系列，便是與《 捉妖記 》的聯乘作。
正在紐約進修的陳法拉亦獲邀出席是次時裝展，一身暗紅色長裙十分貴氣，「剛好今日是星期日，可以名正言順出來睇靚衫。今季Vivienne Tam的設計用東方的顏色同圖案，配上西式剪裁，完美演繹『east meets west』，最重要是我第一次見胡巴真身，他超級可愛！」法拉又表示自己已睇中其中一件型格牛仔褸。胡巴出名精靈活潑，衝出國際一樣氹得外國觀眾非常開心。作為壓軸模特兒，胡巴身穿棒球褸及運動服以街頭休閒look 出場，立即引來所有在場女士尖叫，完騷後不少人更走到後台爭相與他自拍，小妖王也想不到自己如此受歡迎。帶胡巴飛到美國的《捉妖記》監製、安樂影片有限公司總裁江志強，就指真的會安排《捉妖記2》到北美及英國上映，屆時胡巴就可以正式踏上國際舞台。
法拉日間捧了胡巴場，晚上她就變身導遊帶胡巴遊紐約，更細心請了胡巴睇百老匯歌劇《獅子王》（Lion King），「胡巴睇辛巴，而且大家都是闔家歡電影裡的主角。此外，胡巴走在紐約街頭一樣吸引途人注目，意想不到是竟有不少人叫得出他的名字，胡巴成為國際巨星指日可待。這一場時裝騷也吸引了外國名人出席，包括名模：Niki Taylor 、演員歌手Eric West 、Tashiana Washington 等。
