《 一秒拳王 》睇到一套出色嘅港產片誕生實在有莫大嘅滿足感
《 一秒拳王 》故事講周天仁呢個中佬面對自己人生嘅「中年危機」，可以點樣用自己睇到一秒後發生嘅事呢個特異功能，去扭轉人生呢？所謂有危就有機，入咗英毅拳館會創造一條點嘅路？
故事流暢有意思，有熱血有笑有淚。配樂有心做，又有首好聽好入腦嘅主題曲。攝影無論環境大與細，都能夠拍到好好睇嘅鏡頭，加上動作/拳擊戲拍攝一啲都唔易，tight shot都能夠拍到幾中point，加上剪接都有返節奏感，值得一讚！
「良哥」咁細個但表現非常唔錯，又可愛，加晒分。腎爸同查朗，一個本身係歌手走嚟拍戲，一個泰仔又走嚟講廣東話，仲要操到自己要演拳手，兩個表演都可謂超出本份了。
另外有個點好想講，我好驚啲情情愛愛嘅情節好尷尬，拉低成套片嘅觀感，但《一秒》有感情線得嚟係唔突兀（唔係腎爸同恆仔thanks，講緊腎爸同林明幀），兩個人嘅對話仲要係緊扣本文主題，係有意思的，令我大為放心（喂！
多謝趙善恆 ，香港人需要高汁港產片振一振對香港電影嘅信心，好片年年有，只係如果越嚟越多，絕對係喜聞樂見~《 一秒拳王 》亦比《救殭清道夫》有堪稱全方位嘅進步，求你繼續拍好戲！
好戲除咗回本，一定一定一定要賺啊，求埋香港人支持返有質素嘅港產片！
*注意返係有質素，唔係垃圾都叫你盲撐。
文：sowhatmovie
