電影評論

【 MOVIE6 影評 】《劇場版 白箱 》睇得開心為主

《劇場版 白箱 》睇得開心為主

好似好耐都無睇過一部會令我同時笑得好開心,又令我有啲感觸而落淚嘅電影。水島努導演嘅《 白箱 》推出劇場版,今年年初喺日本上映,年底終於輪到香港觀眾有得睇。《劇場版 白箱 》大概只係將製作動畫嘅流程同當中會遇到嘅困難重新包裝一次,重複武藏野動畫公司經歷低潮後再次反彈嘅戲碼,但係導演手法豐富,熟悉嘅角色逐一登場,簡直就係大放送。(雖則大部分角色對故事發展無咩實際意義,只係為咗滿足 fans 而曇花一現)

 

睇得開心為主

最近(又嚟,因為工作同夢想之間嘅糾結,所以)心情超差,以為睇《劇場版 白箱》呢類題材係「唔好放棄夢想,要勇敢追夢」嘅作品會忍唔住爆喊;最後,都叫做有偷偷地流咗一兩滴眼淚嘅。無爆喊,但有爆笑,由頭笑到落尾,笑得好開心。《劇場版 白箱》嘅喜劇元素貼近潮流,特別係有好多諷刺日本動畫業界嘅瘋狂劇情,然後又有惡搞其他動畫、水島努導演自己嘅作品嘅情節,動畫迷一定識笑,而且會笑得好開心。

 

劇情起伏唔大但係表達手法豐富

奮鬥故事當然少不免要出現熱血同沉淪交錯嘅劇情。今次《劇場版 白箱》主線故事喺呢兩方面都未去到極端,主角群嘅經歷其實都係一啲十常八九嘅不如意事,比較單調,唔夠元氣盡情爆發。好在導演手法層出不窮,加插咗歌舞、戲中戲等等奇特嘅戲劇元素,二次元裡面再有二次元,我覺得氣氛做得一啲都唔差。另外,角色嘅肢體語言同埋對白浮誇得嚟華麗,吸引觀眾眼球嘅影像經常出現,完全唔會覺得悶。

 

信息大爆炸

劇情雖然單調,但係信息量龐大。超多角色爭住等出場,可能講得嗰一兩句對白就要退場,甚至乎只係得短暫嘅過場畫面。武藏野動畫公司極速完成一個 task 再接另一個 task,好似好坦白咁話你知,「我哋平時返工做嘢就係咁樣趕頭趕命㗎啦!」有睇過電視動畫嘅觀眾都應該會覺得劇場版交代角色工作內容嘅節奏好急,更何況係對《白箱》無乜概念嘅觀眾?觀眾即使知道一眾角色嘅職位(因為有寫),都可能未必知道大家要負責做啲咩或者實際做緊啲咩。「我知!製作動畫囉!」嗯。

 

文:靈光

You Might Also Like