電影評論

【 MOVIE6 影評 】《 現代啟示錄 :終極版》3小時體驗從肉體到精神上嘅折磨

《 現代啟示錄 :終極版》3小時體驗從肉體到精神上嘅折磨

1979嘅呢套經典《 現代啟示錄 :終極版》讀電影嘅時候呀Sir都有介紹過,但由於播一播就無咗成堂嘅關係,佢都係叫大家返屋企睇。然後今年俾我見到佢重映呀媽媽!我就同大學同學9衝買飛去睇了,開心!呀Sir我睇完喇!(遲咗5、6年)

 

 

一名軍人接到任務,收到風喺越戰爆發期間,一個陸軍上校唔聽指令,喺山高皇帝遠嘅地方自立為王咁款,亂咁殺人掠地,有指佢已經陷入瘋癲。於是呢個軍人為咗進行刺殺任務,深入越南同柬埔寨,與此同時,戰爭如火如荼,發咗癲嘅又豈止上校一人?

 

 

大概一套戲嘅開首幾分鐘就可以為電影定下步調與氛圍,而呢套戲一開始就話你知佢唔係講一場殺戮遊戲咁簡單。對比起真鎗實彈,人內心複雜嘅思想同陰暗面先係災難嘅源頭。觀眾隨住主角嘅任務進行,見到一開始嘅登陸戰,沿河而上見到勞軍晚會、軍人失控殺人、土著攻擊、離地法國佬、邊境地獄⋯⋯所有嘢都係電影帶俾觀眾睇到嘅旅程,呢一切已經解釋緊點解上校會打仗打到走火入魔,而走火入魔嘅都恐怕唔係得佢一個。主角、配角甚至觀眾,大家一齊經歷打仗,由肉體受罪,到電影後段,作為觀眾都覺得睇到精神散渙。(其實電影嘅genre到咗後面已經唔係戰爭片了)

 

 

今次睇有得 enjoy IMAX,可以睇得返一部咁有質素保證嘅經典,可以睇到當時未有航拍又未有咁多CG特效底下拍出來嘅質感,特別係用直升機拍返直升機飛緊嘅Shot,可以睇到馬龍白蘭度呢個咁陌生又好傳奇嘅人,可以睇到一大堆當時仲好型棍但依家睇到「哇原來呀伯你當年拍過《現代啟示錄》呀」嘅老牌演員(除咗夏里遜福 ,佢永遠都好似漆黑之中嘅螢火蟲一樣耀眼)⋯⋯原價$120蚊我再9折哇都係$108蚊實在抵到爛呀!

 

文:sowhatmovie

You Might Also Like