《 熱帶雨 》滴滴雨點，彷彿似流淚
一個女人，事業上嘅崗位不受重視、不受丈夫疼愛、充滿母性卻無法懷孕，只能同完全失去自理能力嘅老爺互相寄托，尋回一丁點存在價值，彷忽生命中各方面都無法被滿足。一個男生，缺乏雙親關愛，血氣方剛，對幫自己補課嘅老師主動求愛。兩個人就好似兩塊拼圖咁自然而然地拼埋一齊，互相填補缺失。
女主角完完全全係一個悲劇人物，佢好慘，慘到我幾乎無法喺佢身上搵到一絲快樂。但佢角色非常立體，我都相信呢個世界喺存在住呢種人，可能就喺你同我身邊擦身而過。我好同情佢，但無法認同佢，如果換轉係我，喺個老公成日唔理自己底下應該開咗佢拖，然後發生家暴事件（欸？，所以後面發生嘅更悲劇事件就唔會出現。利申白羊座。
我本身唔係好識欣賞節奏咁慢嘅電影，頭半個故仔慢慢慢慢咁舖～但的而且確我覺得楊雁雁嘅表演係值回票價。另外要讚揚嘅係楊世彬 ，即係個行動不便嘅老爺。角色幾乎所有生活上你諗到嘅基本嘢佢都做唔到，食飯、上床訓、沖涼……甚至失禁要抹屁股，女主角都要一一幫佢做。當呢一切要搬上大銀幕再搵人演，可以話非常非常難，首先要肯演，外型又要切合角色，仲要演到毫無違和感。佢用手指喺男學生手臂比劃教佢寫唔識嘅字呢一幕好深刻，即使行動幾有限制都好，都能夠話到俾觀眾知呢個角色嘅心境，係有血有肉嘅人。呢個角色嘅離去，好似就喺女主角遍體鱗傷嘅身驅上再大劈一刀，唉。
配樂入面，許冠傑嘅是雨是淚真係食到正一正：就讓雨把往昔都沖去，莫怨恨誰
文：sowhatmovie
