《 日出前讓戀愛開始 》重溫少年時代的浪漫
世界盃開波，條街靜英英，戲院雖然未至於成重災區，但最近又實在無乜話題作品上畫。淡靜期上淡靜戲，有部《 日出前讓戀愛開始 》上星期悄悄上畫，片名擺明抽張學友水，有趣的是呢部戲係打後生仔主意，D細路有權唔知歌神喺1992年有首金曲叫《 日出前讓戀愛終結 》。
而呢部戲，竟然係港產經典《新不了情》嘅變種再變種，真係幾驚訝。話說《日出》改編自2006年嘅日本純愛電影《太陽之歌》，而《太陽之歌》其實又改編自1993年之《新不了情》……橫跨25年嘅接力，到今時今日呢點只可以當做一個funny fact，事實除咗「絕症歌女去拍拖」呢個元素係一樣之外，其他嘢真心唔關事。
而卡士係另一樣funny嘅地方，在戲中超純情嘅女主角Bella Thorne現實中係一名當代豪放女，對展露美好身段毫不吝嗇 (佢IG真係幾精彩)，公開自己雙性戀傾向之餘亦敢愛敢恨，好難明卡士佢嘅人係點樣睇到佢演呢個角色嘅潛質，但香港觀眾對佢無先入為主嘅印象，在戲中睇落都幾順眼；至於男主角Patrick Schwarzenegger，無錯，見到呢個水蛇春嘅姓氏應該估到佢就係大隻佬阿諾個仔！ 文質彬彬，係賣樣嘅。
有齊靚仔靚女靚景，加條絕症橋，《日出》係穩陣嘅。少男少女嘅戀愛情懷，講就老土，但睇畫面都幾浪漫，後生仔應該投入到，年紀大啲都唔難回憶起自己後生都曾經咁樣為愛情傻豬過，每日準時企喺同一個地點只係想暗戀嘅對象經過時望到佢一眼。《日出》除左愛情，仲有阿爸費盡心力照顧絕症囡囡喺度派洋蔥，而飾演女主角閨蜜嘅Quinn Shephard幾搶鏡，外型sweet之餘角色夠爽夠雷，令人讚嘆「人生有個真正朋友的確好極」。人生同電影一樣，愛情以外，有埋親情同友情，真係豐富同完滿好多。
文：一觸
只要有電影，就好。
