《 濁水漂流 》對政府滿滿的控訴意味
故事啟發自真實事件，一班露宿者喺食環無預警底下被清走家當，輝哥（吳鎮宇）等露宿者決定控告政府，提出申索同要求政府道歉。訴訟期間，街友們嘅命運會係點樣？
電影俾我嘅感覺係，佢係一套無旁白、順敍法而又帶少少戲劇效果嘅《星期日檔案》。我知道佢係一套fiction，但真實感又不輸於non-fic。聞說團隊做左好多資料搜集、深入探討露宿宿呢個題材，就係因為咁，啲人物、故事感覺都真到好似《星期日檔案》咁。
我記得當時睇《麥路人》覺得人設同故仔也太煽情，無乜說服力，演技略誇張，故仔想感動觀眾但感動唔到，嗰吓睇完係劣評的。最得意嘅係，兩套電影各自都講緊一班露宿者，角色人設同演員演技上《濁》都略勝一籌（城繩VS鎮宇，千嬋VS李麗珍，萬梓良VS謝君豪，Zeno VS Will)。《濁》草根味好濃，睇完佢對政府嘅控訴，會覺得氣憤、無奈，會反思，好似睇完戲會有一點點得著。
本地人排唔到公屋、政府做錯嘢唔肯道歉、對露宿者趕盡殺絕⋯⋯戲入面嘅情節無時無刻咁提醒緊我呢個政府有幾仆街、呢個失去人性嘅城市又有太多太多地方要指住嚟鬧，睇完唔多唔少都有啲壓抑。
文：sowhatmovie
