《 可不可以，你也剛好喜歡我 》睇完預告少女心大爆發，要入場滿足一吓
《 可不可以，你也剛好喜歡我 》故事講田筱湘一直鍾意青梅竹馬嘅李助豪，點知埋門一腳表白嗰陣，李助豪竟搶先一步向好友宋依靜表白！身為KOL嘅依靜開出交往條件（真係屎忽鬼），要求助豪要先完成任務：撮合三對絕緣嘅男女，之後先可以同佢喺埋一齊（What a bitch）。助豪向好友筱湘求援，筱湘自覺收皮之餘，半推半就同意幫手，到底最後能唔能夠有好結果呢？
電影改編自暢銷散文，其中一個弊病就係因為電影篇幅所限，中間一啲可能散文中好睇嘅情節會帶過得好快。所謂「撮合絕緣男女」呢個聽落好難嘅任務，喺戲入面就變得好易解決，唔知散文係咪都係咁易啦orz。同埋三對男女，同本身故仔嘅三角關係扣得唔夠實，除咗「御姐」嘅故仔之外，其他人物出現彷彿可有可無，甚至抽起一對男女，換過pair入去，其實也無不可。
另外就係，我覺得本身男女主角唔能夠喺埋一齊嘅理由同設定有少少夾硬，作為衝勁十足嘅白羊座有點不能理解。但戲入面兩個人作為好友而一齊周圍去嘅場口係幾sweet，幾適合情侶去睇。呢種友達以上嘅感情，可能會換來唔少觀眾有共鳴，內心大嗌一聲「唉呀～點解唔喺埋一齊呢索性～」
入得場睇呢啲戲，請準備好你個少女心。橋唔怕舊，最緊要受，從來呢類戲都有市場。我唔算叫大推《可不可以》，但同行朋友就反而幾受落。
文：sowhatmovie
