回顧梅姐一代巨星光華 ！「We Miss You So, Anita我們永恆的百變天后」 梅艷芳 紀念展覽 及 主題下午茶
永恆百變天后梅艷芳雖然離開我哋 18 年，但我哋仍然無忘記呢位香港的女兒，佢嘅歌聲及舞台風姿，永遠都長存於大家心中。適逢梅姐傳記電影《梅艷芳》（ANITA）即將上映，安樂影片與富衛1881公館於 2021年10月1日至11月30日，舉辦「We Miss You So, Anita 我們永恆的百變天后」紀念展覽，除咗展出多套電影戲服，仲有不同絕版粉絲收藏品、本地藝術家向梅姐致敬嘅作品，以及推出電影主題下午茶及慈善紀念品，等大家可以重溫百變天后梅艷芳嘅攝人魅力。
「We Miss You So, Anita我們永恆的百變天后」紀念展覽
今次精選展出嘅 3 套電影《梅艷芳》戲服，分別代表咗梅姐演藝事業上三個重要時刻，而服裝以原本的設計為靈感，再重新塑造而成。包括：1982年參加《第一屆新秀歌唱比賽》，演繹徐小鳳名曲《風的季節》時所穿著嘅「黄金戰衣」；電影《胭脂扣》入面嘅旗袍戲服，飾演如花更讓梅姐拿下三料影后；以及最後一個演唱會上唱最後一首歌時著嘅婚紗。
「黄金戰衣」
電影《胭脂扣》旗袍戲服
最後一個演唱會上穿著嘅婚紗
行到另一邊，可以見到《梅艷芳》(ANITA) 電影及幕後製作花絮特色牆，當中一幅兩米多高的大劇照方便大家打卡留念。而劇照背面有多張由收藏家阮紫瑩女士提供嘅梅艷芳舊照，展示佢不同年代嘅不同造型。
主辦亦邀請咗多位分別屬於70至00後歌迷影迷，借出他們的梅姐珍藏於場內展出。好多珍藏都係市面上非常罕有，甚至已經無可能再揾到，當中包括：剪報、雜誌、卡式帶、黑膠、代言產品等，佢哋更同大家分享與偶像Anita的回憶同對佢嘅思念。
而梅姐生前曾喺訪問中曾提及過佢特別喜愛《夕陽之歌》，因為歌詞正正是她一生的寫照。因此，展覽主辦特意將《夕陽之歌》嘅歌詞裝飾了一段樓梯，每一級一句歌詞，等各位可以一邊打卡一邊細讀歌曲箇中意味，非常有意境。
是次展覽聯合三位80後至90後嘅本地插畫及書法藝術家，包括Keo、賣字及留情，為展覽創作出全新致敬作品，從不同年代嘅藝術家嘅作品中，以不同角度表現出佢哋眼中嘅梅艷芳。而作品會於展覽後作公開出售，將全部收益捐贈兒童癌病基金。
展覽期間將會販售期間限定，由本地廚具及家品品牌建樂士 Kinox 聯乘本地年青插畫家推出嘅 Anita 展覽主題限量版雙層不銹鋼保溫杯，一共兩款，每款限量150個，扣除開支後，收益將捐贈兒童癌病基金。
「We Miss You So, Anita我們永恆的百變天后」紀念展覽
展覽日期：即日至2021年11月30日（《梅艷芳》電影戲服展期到2021年10月16日）
開放時間：11:00 – 21:00
地點：香港九龍尖沙咀廣東道2A號富衛1881公館主樓HG樓層
費用：免費入場
「Forever Diva 永恆的百變天后」主題下午茶
睇完展覽緊係要食個 high tea！富衛1881公館現代法式餐廳ODEA亦推出「Forever Diva 永恆的百變天后」主題下午茶，主廚 Mark 將梅姐多個經典造型同喜愛嘅港式美食融入餐點設計，製成主題下午茶。
法式蛋白霜雪山
製作靈感來自Anita 《夏日戀人》頭頂生果的森巴女郎造型嘅夏日意式奶凍
根據Anita《烈燄紅唇》大碟經典前衛窩釘造型仿製的伯爵奶茶馬卡龍
以黑松露提升蛋白的層次的黑松露蛋白三文治卷
鵝肝醬爆炸糖泡芙，好似 Anita 嘅百變造型，往往爆發驚喜
鹹點\
甜點
「Forever Diva 永恆的百變天后」主題下午茶
推廣日期：2021年10月1日至11月30日
供應時間：14:30 – 17:00
餐廳：ODEA
地點：香港九龍尖沙咀廣東道2A號富衛1881公館主樓地下
查詢：3988 0088
價錢：HK$698兩位用 (另設加一服務費)
*凡享用「Forever Diva 永恆的百變天后」主題下午茶的客人，將會獲贈限量版「We miss you so, Anita 我們永恆的百變天后」主題黑膠碟造型杯墊一個。數量有限，送完即止。
**凡享用每套「Forever Diva 永恆的百變天后」主題下午茶，富衛1881公館將會捐出$18予兒童癌病基金。
