《 十二夜 》編導 林愛華映後訪談 廿年後再睇感嘆「死啦寫到啲男人咁衰」
1 相隔廿年再睇《 十二夜 》有咩感覺？
《 十二夜 》有啲對白都已經唔記得，拍過咩？寫過咩？拍得比較幼嫩。以前感動嘅位同今晚又唔同咗，隨住年紀唔同原來係會唔同咗，唔同成長階段都有唔同嘅觸動位。
以前好鍾意分手落雨個場，咁辛苦拎部電腦俾你又唔重視，好代表到我哋女人嘅心聲。但頭先睇，我最感動竟然係結局。結局個感覺好似「又走過一回了」，可能年紀大咗，呢樣令我更加感觸。（以前同依家對愛情嘅睇法有咩唔同？）依家寬容咗啲，死啦，好似寫到啲男人咁衰。哈哈，有啲唔好意思。依家睇返有兩個位我覺得應該收少少，嗰時覺得天公地義。
2 點解Eason個角色要叫個咁偏既姓「禤」？有冇原因？
其實全部角色名都係我朋友嘅名。而嗰班係我讀導演會嗰班朋友嚟，所以專登紀念佢哋。姓「禤」嗰個就好尷尬，佢女朋友之後識我哋，就問「點解改個男仔名姓禤，係咪講緊我哋？」唔係啊！係個名好似好高級咁所以先用。完全唔關佢事。
3 盧巧音個角色有冇暗戀張柏芝？
頭先我睇嘅時候，咦，係喎，有句對白好似俾人誤會咗。「好多人鍾意你㗎」，我見盧巧音演嘅時候，佢好似詮譯咗個意思做「我都鍾意你」。哈哈，我依家睇覺得係，我寫嘅時候冇咁諗，但都可行嘅。盧巧音真係好鬼馬，做得好好。當時好辛苦，拍到半夜都唔為意。
4 點解分手都要喺7-11？
嗰時寫劇本係有兩個前設，第一個係想寫好多對白嘅劇本，冇乜劇情嘅；第二個就想多啲香港特色，例如地鐵、7-11、街…… 同埋夜晚嘅7-11好「香港」，大家都會去食嘢、傾計、分手咁。好好笑，早幾日喺中環行過，見到一對人，我哋依家戴口罩嘛，咁嗰一男一女就冇戴，著同樣顏色嘅衫，即係情侶啦。企埋牆度又唔講嘢，咁我諗佢哋嗌緊交。嗌交係可以唔理喺邊度，要發生就發生。
5 點解柏芝鼓起勇氣同舊愛Eason訴心聲，Eason個衰鬼要瞓着呢？
我頭先睇返又係有少少唔忍心，點解我嗰時寫嘢咁Mean。講到咁投入做咩要瞓啊，廿年之後我個人真係冇咁Mean。嗰時覺得呢下係成場戲亮點，我寫嘅時候已經決定佢要瞓。我正正想講如果對方嘅感情抖多幾抖，你點樣做其實佢都係瞓覺，佢都唔會有反應。
6 拍完《十二夜》有冇變咗愛情專家？
有啊，我成日都係「盧巧音」。成日都要陪佢哋、不斷講嘢，不過其實冇乜用，佢想你同意佢之嘛，咁你咪同意下佢囉。但我有時都幾白，試過俾人話「你講嘢都幾辣㗎喎，但又好啱」所以好多朋友失戀都搵我。（點算啊咁多朋友搵你）咁咪用嚟寫劇本哈哈。我有時真係幾冷血，對方喊呢，會覺得又唔係死人冧樓、又唔係冇咗層樓、又唔係冇咗份工、又唔係個《國安法》，依家我哋就真係喊喇。
7 如果有續集，你會寫廿年後Jeannie同Alan，定係全新嘅故事？
其實我寫咗個《十二日》，係講夫婦。講一對夫婦由結婚嗰日到今日想分開，又分唔開再喺返埋一齊，嗰種嘅無奈。都幾有趣，拍拖同結婚嘅相處、大家嘅期望係有啲唔同。依家睇呢個係比較年輕，小朋友拍拖，《十二日》就真係好深入，兩性關係嗰種真係好愛對方而唔能夠傷害嗰種痛。其實好奇怪，你好愛一個人，但你又唔能夠再愛。《十二夜》嗰啲唔係「愛」，都係拍下拖，當其時覺得好愛，《十二日》就係講好深嘅感情。
訪問：SC
文字：Janis H.
