《 新異變人 》又唔係話難睇嘅
多災多難嘅《 新異變人 》終於上映（要強調，係上映咗），故事竟然係發生喺《盧根》時期，有啲 surprise，而更 surprise 嘅係，本來以為已經斷咗尾嘅一條《變種特攻》電影系列伏線再度蒲頭。當然啦，係咪「假陽性」，都要睇 Marvel Studios 嘅決定同觀眾嘅反應。我自認係一個好理智嘅 X-Men 影迷。《 新異變人 》對我嚟講，劇情、製作或者演出上都無致命嘅問題，唯一問題其實出喺導演身上，想 crossover 超級英雄電影同恐怖電影，最後失敗。
普普通通
《變種特攻：黑鳳凰》可能係你睇完之後會好想鬧爆佢嘅《變種特攻》正傳電影，而《新異變人》只係你睇完之後對佢無咩感覺嘅《變種特攻》外傳。《 新異變人 》嘅人設同背景其實都好吸引，部分演員（例如 Anya Taylor-Joy）嘅演出又唔差，可惜故事推進無乜驚喜。電影有太多主題想講，包括青少年嘅反叛、克服內心恐懼等等，全部都係流於表面，無好深入嘅探討。五位主角各有各恐懼，但係電影表達唔到呢啲恐懼真正對佢哋嘅人生構成咗啲咩重大嘅影響。
違反商品說明條例
導演 Josh Boone 希望《 新異變人 》創新，成為一部「超級英雄恐怖片」，但係要懸疑無懸疑，要驚嚇無驚嚇，結果《新異變人》只係另一部平平無奇嘅超級英雄電影。當日傳出電影公司要求《新異變人》向《小丑回魂》等等爆紅嘅三級恐怖電影借鏡，要嚟個「massive reshoot」，最後 Josh Boone 堅持話「絕對無重拍」。正常電影公司出手影響導演決定都唔係啲咩好嘢，不過今次可能係例外，唔明 Josh Boone 堅持啲咩，真係覺得而家呢個「初衷」好正好成功？我自己本身就好怕睇恐怖片，但係睇《 新異變人 》嘅時候我連一個冷震都無打過。
又唔係話難睇嘅
無期望，就無失望。故事規模細唔一定係超級英雄電影嘅死穴，好似《死侍》咁樣都可以拍出新穎有趣嘅風格。唔代表超級英雄電影唔可以玩青少年題材或者恐怖元素，只係《 新異變人 》做唔到咁解。不過要超越新生嘅《神奇4俠》同埋（well，都算係新生嘅）《變種特攻：黑鳳凰》，《新異變人》真係完全未夠班呢⋯⋯啊，可以至少移植 Magik 過去 MCU 嗎？
文：靈光
