《 致莎瑪︰敘利亞家書 》一套好戲正無聲無息地上映中！
*《 致莎瑪︰敘利亞家書 》唔係虛構故事，佢係一套紀錄片*
一個大學生本來拍片是為記錄日常，但敍利亞由和平示威變成政權向人民開戰，拍落嚟嘅片段見證政府血腥鎮壓市民，亦都成為一封「家書」，話俾未來嘅囡囡知，佢嘅父母輩點解要留喺屬於自己嘅城市阿勒坡…
阿勒坡係敍利亞第一大城市，娃迪（導演）一開頭都係拍攝住大學生發起嘅和平示威，之後越演越烈，有數十民平民雙手被綁成為浮屍、人民組織反抗軍、政府軍向平民開炮、政府軍炸平民醫院….阿勒坡係必爭之地，傷亡非常慘重。
電影入面一幕幕炮轟、醫院入面滿地傷者全部都係切切實實發生緊，有媽媽喺條街到抱住死去兒子嘅屍體哭喊…有兩個小朋友抱住被炸中嘅弟弟到醫院，但已經返魂乏術…但戰爭中一樣會有生命嘅奇蹟發生，觀眾情緒一路隨住每段片段起落，會悲傷、會感動、會流眼淚。無電影可以比呢部紀錄片更真實呈現戰爭嘅可怕與無常。
娃迪同做醫生嘅另一半選擇留喺阿勒坡，仲生咗囡囡莎瑪。娃迪喺片段度同囡囡道歉，抱歉將佢生於亂世，每日擔驚受怕，身邊更不時有同胞身亡，但希望囡囡理解父母奮戰到底嘅原因。
有幾段片段都好深刻、好心痛，其中一段係娃迪同朋友嘅仔仔傾計。
「如果你爸媽要離開阿勒坡，你會點？」
「我想留低。」
「你啲朋友依家點？」
「有一部分走咗喇，剩低嘅逐個逐個被炸死…」
小朋友講吓講吓就忍唔住喊了。
持續9年嘅敍利亞內戰至今仍未平息，中俄兩國去年否決聯合國援助敍利亞。世界上仲有好多地方無時無刻都喺度同極權對抗，甚至比香港情況惡劣百倍。呢條路唔易行，但香港人並非孤單。
我無辦法通過文字完全地表達呢套電影對我心靈嘅撼動，呢套係今年睇過最好睇嘅電影之一。希望大家可以入場支持，你得到嘅體會絕對超乎想像。
文：sowhatmovie
