電影評論

【 MOVIE6 影評 】《 睇你幾時死! 》痴L線電影

《 睇你幾時死! 》痴L線電影

平時睇戲中途聽到有人講嘢,我一定會好想佢收聲。今次睇《 睇你幾時死! 》嘅時候,聽到後面觀眾好幾次發自內心地嗌出:「痴L線!」,但我並冇怪佢,仲好認同佢。因為呢部電影的確好「痴L線」,畫面血腥、角色荒誕,故事又充滿黑色幽默,合埋一齊睇真係非常過癮!

 

 

劇情就咁聽落,都已經夠怪誕:一個古惑仔受女友所託,單人匹馬走上門諗住殺死女友爸爸,點知女友爸爸並唔簡單。一件「普通」嘅殺人任務,慢慢變成一條鎖匙,逐漸打開每個角色嘅陰暗面,揭穿大家嘅秘密……

 

電影一開波好快就「嚟料」,作為一個唔係成日睇血腥電影嘅人,我直程有一刻後悔入場。事關古惑仔同人哋老豆除咗用鎚仔做武器,仲動用埋屋企嘅傢俬電器,好似櫃同電視機,後來仲用埋電鑽同槍(作為戰鬥民族,屋企有槍係非常之合理嘅)。兩人毫不留情出力互毆,睇到我一邊好肉緊,一邊又擔心自己到底頂唔頂得順……不過,雖然畫面係暴力血腥,但氣氛同對白又搞笑多過恐怖,令我諗起星爺套《回魂夜》。

 

 

本來以爲成套戲就係睇人打交,但我發現,雖然《 睇你幾時死! 》以血腥做賣點,但佢冇淨係專注一堆變態爆血嘅畫面,搞到忽略咗劇本。相反,故事其實帶到畀我驚喜。一路睇都估唔到劇情點樣發展,亦都估唔到結局係點。平時睇呢類「奇幻電影」最怕爛尾,但佢冇!成套電影畀我嘅感覺都好完整。

 

完場嗰陣,我第一個諗法係:「唔知套戲用咗幾多公升血漿呢?」雖然只係睇人打,但我都有種畀人打咗一身嘅感覺,證明真係睇到好緊張。如果要形容呢套戲,我覺得係《非常外父》x《恐懼鬥室》x《回魂夜》。鍾意睇重口味電影嘅你,一定要入場睇!

 

文:SC

You Might Also Like