電影評論

【 MOVIE6 影評 】《 攣愛季節 》聖誕大餐有甜亦有苦

《 攣愛季節 》聖誕大餐有甜亦有苦

有一條 formula,用嚟拍戲幾乎都係唔好睇,就係「(聖誕節+大家庭+大派對)x (愛情+喜劇) = 爛」,不過偶爾都會有例外。《 攣愛季節 》唔只打破咗呢條 formula 嘅魔咒,而且笑中有淚,劇情有意思,唔係柴娃娃笑完就算嘅喜劇。電影故事裡面問咗一條問題:「被認同係咪就係等於被愛?」戀人之間又好,家庭成員之間又好,甚至乎係自身嘅身分認同都好,《 攣愛季節 》都有唔少令人眼濕濕嘅探討。

 

聖誕大餐有甜亦有苦

《攣愛季節》講述 Kristen Stewart 同 Mackenzie Davis 飾演嘅一對戀人開開心心諗住去 Mackenzie 屋企過聖誕,點知原來 Mackenzie 未同佢極麻煩難搞嘅屋企人出櫃,聖誕節五日假期難關重重,一向比較「做自己」嘅 Kristen 壓力爆煲。兩位女主角互動甜蜜,相當入戲,表現到戀人就响身邊但係無辦法恩愛嘅鬱結。Mackenzie 嘅角色更加有少少陰暗面,令《攣愛季節》呢個框架雖然大路但係人物關係、角色情緒豐富嘅故事添上更多層次。

 

神經質配角超搞笑

Kristen Stewart、Mackenzie Davis 負責甜蜜嘅部分,至於 Mackenzie 一家就負責搞笑。阿媽尖酸刻薄,家姐妒忌心重,細妹過度活躍,各有各有趣嘅行為以及對白,特別係阿媽停唔到口咁諷刺身邊所有人,句句有骨,對白絕妙。唔少聖誕喜劇都係以角色瘋狂撞板嘅劇情去博觀眾一笑,而《攣愛季節》就唔玩「視覺刺激」,善用生鬼嘅對白嚟完成任務,顯得劇本更加有心思。

 

聖誕派對總有事

笑完,要喊。聖誕派對好容易出事,《攣愛季節》嘅高潮都係例牌响聖誕派對大爆發,不過最後《攣愛季節》將好笑嘅地方一一化做感動位,突然有好多眼淚湧現。故事比我想像之中更加有內涵,道出易學難精嘅道理:「每個人都有屬於自己嘅故事,都有屬於自己需要面對嘅關口⋯⋯」頓時令電影嘅主題變得更加清晰。去到結局,每位角色一夜覺醒,係就係快咗啲,不過,聖誕節,團圓、快樂、幸福,都真係必備嘅。

 

文:靈光

You Might Also Like