香港動畫《 離騷幻覺 》搞眾籌  計劃發起人及動畫導演 MOVIE6專訪

製作動畫唔容易；喺香港製作動畫，更加唔容易。由香港漫畫家及動畫導演 江記 發起嘅動畫計劃《 離騷幻覺 》 Dragon’s Delusion – The Animated Sci-fi Project，聯同兩位香港動畫導演 李國威 、 崔嘉曦 一齊發起眾籌，達成首輪眾籌目標，得到香港動畫界以及其他界別人士嘅支持。

問：點解會想拍一部咁有哲學意涵嘅電影？

答：尋找生命嘅意義，追尋靈魂嘅價值，係任何時代都會追尋嘅問題。就算未來嘅人，相信都會有同樣嘅想法。我哋希望呢套作品，可以紀錄今日，屬於呢個年代嘅答案。

問：今次動畫整個設計同以往見到嘅香港動畫好唔同，例如運用顏色非常鮮艷，點解會諗到用呢個風格？

答：香港係一個既有傳統，亦充滿未來感嘅城市。《離騷幻覺》嘅用色，就係呼應咁樣嘅

環境而出現嘅風格。嗰種好爆好爆，大紅大綠嘅用色，其實象徵對生命嘅焦燥不安，想用最短時間達至最大嘅效果。

問：有無因為擔心過電影風格或者題材冷門而放棄？

答：無，因為我哋相信，觀眾一直渴求突破性嘅作品，而幸運地，由今次眾籌活動嘅反應可知，我哋嘅想法係有好多同行者支持。

問：有無諗過眾籌失敗嘅話，你哋會有咩打算？

答：眾籌結果無從估算，但創作嘅路仍然會一直走落去。

問：動畫嘅先導片有三位導演，咁你哋係點分工？

答：《離騷幻覺》開始嘅時候係江記嘅漫畫作品，後來計劃成為動畫，三位導演喺 brainstorm 嗰陣都有互相交流各自嘅想法，無論係畫面上嘅，抑或係故事上嘅。到製作嘅時候，江記負責前期製作，例如 storyboard、原畫等，李國威同崔嘉曦則集中處理合成、電腦動畫、特效同後期等等。

問：我諗有部分未必認識動畫製作或電影嘅市民會好奇，點解製作動畫要咁多錢。可唔可以簡單講解資金嘅運用？

答：動畫，係非常依賴人手去製作嘅藝術品。一個鏡頭，由劇本、草圖、原畫……到後期合成、特效、剪接等等，期間有十幾個工序，而一齣80分鐘嘅電影大概有一千二百幾個鏡頭。可以想像，無足夠嘅人手，係無辦法可以喺有限嘅時間內完成，所以好大比例嘅資金會運用喺人力資源上面。

問：香港動畫比其他地方動畫優勝嘅地方係？

答：香港本身就係一個超越想像嘅地方，而香港動畫，最吸引我嘅地方，係佢特立獨行嘅風格，以及往往打破框框嘅敍事模式。

問：覺得喺香港做動畫最困難嘅地方係？其實有無咩機構、計劃可以幫到有志做動畫工作嘅年輕人？

答：創作人喺呢個城市面對嘅困難，係生存嘅困難。即使唔係創作人，每日都要去面對。喺我經驗中，資金有以下幾種：私人嘅、公營嘅以及嚟自觀眾嘅，任何方向都可以發掘機會。藝術發展局、creatHK 嘅動畫支援計劃可以算係公營資金；嚟自觀眾嘅資金，可以係票房，而地區放映，都係一個方向。當然，網上眾籌，仍然有好大嘅空間。

問：完成整套動畫長片真係好難，你哋總共需要幾多人力同時間先達成到目標？

答：暫時嘅計劃，係有五十人嘅核心團隊，可以係由獨立創作人同中小型公司合作。如果資金充足，製作時間可以控制喺24至30個月以內。

問：有咩人想特別多謝？

答：所有支持《離騷幻覺》嘅朋友，不論任何形式！

問：之後嘅籌款會有啲咩策略？

答：眾籌活動完結之後，我哋會先完成80分鐘嘅劇本，而根據當下所得嘅資金推算，我哋會喺2019年九月，開始完成十分鐘嘅製作。

問：將來都一定會堅持動畫創作？又或者你哋有其他目標？

答：係，我哋會堅持動畫創作。

按此進入眾籌網址

 

問題：Janis H.、靈光

答：江記、李國威、崔嘉曦