《 跨越8年的新娘 》 佐藤健 、 土屋太鳳 MOVIE6 專訪
由 瀨瀨敬久 執導， 佐藤健 、 土屋太鳳 主演，改編自真人真事嘅《 跨越8年的新娘 》講述女主角麻衣患上罕見病抗 NMDA 受體腦炎，男主角兼麻衣未婚夫尚志守候麻衣八年，終於等到麻衣醒返，大團圓結局。拍攝事前，製作團隊借咗尚志同麻衣真實對抗病情嘅錄像做參考，亦都有同當事人了解事情經過。今次，我哋有幸可以訪問佐藤健同埋土屋太鳳，問咗幾條關於承諾同記憶嘅問題。
問：對於兩位再次合作有咩新感受？
佐藤：雖然之前同土屋太鳳合作《浪客劍心》係好耐之前嘅事，但係基本上大家都無咩點變過呢。因為一直都想再同土屋太鳳合作，所以有今次機會真係好開心。麻衣係一個好難演嘅角色，我覺得都係因為有土屋鳳太飾演麻衣，《跨越8年的新娘》先至會咁好睇。
土屋：我一直都叫佐藤健做「健前輩」呢，當然佢係我好尊敬嘅演員。收到劇本之後，我都有同「健前輩」討論點樣將我哋睇過原著之後得到嘅感受交織埋一齊。衷心多謝「健前輩」畀咗我一個咁好嘅經歷！之前拍《浪客劍心》，「健前輩」由頭到尾都要好似劍心一樣咁充滿殺氣，今次佢就終於似返一個普通人喇。
問：你哋有無堅守過咩長時間嘅承諾？
土屋：有，但係長時間嘅承諾通常都會連住一個秘密呢。
佐藤：如果係約定嘅話，事無大小，無論要捱幾多時間，我都會想一直遵守落去。
問：咁如果你哋現實中嘅伴侶昏迷咁多年，你會點做？
佐藤：我一定會竭盡全力，思考同搵最好嘅方法令佢醒返。
土屋：我唔會猶疑，我會選擇等待。不過與其話只係等佢醒返，我會好似尚志先生一樣，喺等待嘅時候傾出同累積我對佢嘅愛，同我最重要嘅人嘅生命聯繫起埋一齊。
問：令你哋自己恢復記憶，最好嘅方法又係咩？
佐藤：就係去我曾經去過嘅地方，搵返我屬於嗰個地方嘅記憶。
土屋：其實我都有親戚試過曾經因為交通意外而喪失記憶。聽過親戚嘅親身經歷之後，發現果然「愛」先至係最好嘅方法。有人需要時間，有人需要改變環境，或者都需要接受適當嘅治療，但係無論如何，所有嘅方法都必需要基於「愛」，有「愛」係最重要。
問：你哋想向《跨越8年的新娘》嘅觀眾傳達咩信息？
佐藤：希望睇咗呢篇訪問嘅你，同埋努力戰鬥緊嘅每一位，都可以見證到《跨越8年的新娘》故事裡面，麻衣同尚志呢個家庭所得到嘅一大奇跡。
土屋：病人嘅治療進度因人而異，而且未確立最佳嘅治療方法，好多呢啲家庭都會覺得好不安。我演麻衣呢個角色嘅時候，唔單止要代入麻衣嘅想法，對於患有罕見病同致力進行緊復康治療嘅每一位病人，我演繹嘅時候都投放咗好多情緒喺佢哋身上，希望觀眾都可以感受得到。
後記：
問到土屋太鳳有關佢夢想中嘅婚禮，佢話想好似《跨越8年的新娘》嘅麻衣一樣，喺同男友相遇嘅日子，並喺大家重視嘅地點到舉行婚宴。喺一個充滿緣份嘅地方，得到大家嘅守護，希望未來20年、50年都可以維持安穩嘅婚姻生活，真係好浪漫。
問題、文字：靈光、Janis H.
