徐若瑄 回憶拍攝《信用欺詐師JP: 公主篇》 最難忘差啲唔見過千萬日元耳環！
徐若瑄 於《信用欺詐師JP: 公主篇》飾演刁蠻任性的千金大小姐，電影上映後，不單止獲得港台觀眾好評，連日本網民都表示被女神的魅力迷倒！近日，徐若瑄 接受 Hong Kong Movie 專訪時，透露了拍攝電影期間的趣事，當中最難忘的，原來是差點遺失價值逾千萬日元的耳環！
徐若瑄 x Hong Kong Movie 專訪
1. 你同角色有幾相似？
我同戲入面嘅角色應該係相反。我外表睇落好柔弱，但內心好刁蠻哈哈。
因為我細個開始就比較似男仔，屋企環境唔係幾好，所以從小就喺一個好需要努力嘅環境下長大。個人需要好Tough，都好衝動、任性，所以我覺得大家成日被我嘅外表呃到哈哈。
2. 今次同三浦春馬拍戲，對佢有咩印象？
我有一場同佢跳舞嘅戲，雖然我冇同佢真正有對白咁對戲，但我覺得佢好適合個角色 – 愛情嘅騙子。好靚仔，如果係女仔都會俾佢呃走。
3. 拍攝嗰陣有咩難忘事？
因為戲入面我哋都係珠光寶氣嘅人，所以為求真實，我哋真嘅都係真珠寶。喺最大嘅Party嗰場戲，因為有人要嚟現場整爆破，所以大家都跑走。然後跑嘅時候我有隻耳環跌咗我唔知。收工要還返俾珠寶部嘅時候，我有一邊耳環唔見咗！成個劇組都好緊張，個耳環係超過一千萬日元（約港幣七十三萬多）！如果唔見我哋要賠錢。嗰陣又天黑了，天黑仲難搵，大家都搵唔到，飯都食唔落，心情超差。大家就用手機開電筒周圍搵，後來就喺Party一架車嘅車轆隔離搵到了！如果唔係唔知搵邊個賠一千萬Yen。
4. 你最想同邊位導演合作？
李安。因為我覺得李安導演係每一次都會俾我驚喜。有啲導演只會拍固定一類型嘅電影 ，但係我覺得李安每次都係唔同嘅片種，好驚訝佢嘅多元化，同埋佢睇世界嘅角度。佢仲識得拍唔同嘅文化、唔同題材嘅電影，所以我好鍾意、好鍾意李安導演，希望可以同佢合作。
（有冇特別嘅題材想同佢合作？）
喔！我都可以。只有佢揀我，冇我揀佢。哈哈哈。因為導演總可以將演員放喺好適合嘅位置，所以希望有機會我都喺導演劇本入面，成為佢覺得適合嘅演員
5. 喺日本同台灣拍電影有咩唔同？
喺日本拍電影，已經決定嘅事包括劇本、對白，都會按照上面去做，可能有95%都係之前準備好。但係我覺得華語市場包括台灣，係比較隨性。可能到現場，我哋會因為導演或演員，或者現場環境嘅唔同，成場戲就會大改，或者成場戲對白都改哂。演員對戲嘅時候發現「會唔會咁樣更好？」或者係導演發現，成場戲就會同劇本入面完全唔同了。就會比較即興。
6. 你本身識咁多語言，有機會仲想學邊個語言？
有時間我想學韓文啊！哈哈，因為我睇幾多韓劇，但要睇字幕。我相信任何地方，你只要直接聽得明個語言，情感會嚟得更直接，你會睇得更過癮。我覺得翻譯幾好都好，一定都有落差。
（有冇特別鍾意嘅韓劇？）
早排好鍾意《愛的迫降》！因為太鍾意了，所以我就寫咗入新專輯入面。
新專輯入面有首歌叫《不敗的》，有句歌詞就係「不怕狂風 把我吹往反方向，越過困難我變得更堅強」。呢個就係睇完《愛的迫降》，因為女主角被吹到反方向，吹到另一個地方。然後佢喺嗰邊生活困難重重，但最後變得更堅強，佢亦搵到生命中真正想要嘅嘢，所以我覺得呢件係非常勇敢嘅事。反正我睇完劇都會有諗法，有時就會寫喺歌詞入面，呢首歌叫《不敗的》，大家都可以聽下。
文：Janis H.、SC
