飾演園藝師都要學埋茶道！《 夕霧花園 》導演林書宇 親筆寫信 誠邀阿部寬出演
導演 林書宇之前嘅作品《百日告別》，因為自己嘅經歷拍出失去、自我療癒、放下嘅心痛過程，今次《 夕霧花園 》亦唔例外，喺今屆金馬獎更有9項提名、榮獲最佳造型設計，但同時要挑戰日本各種藝術、戰爭背景等處理，佢自己本身對故事又有咩感受？又點解搵嚟影后李心潔、日本巨星阿部寬出演？等我哋同導演傾下計。
Q：電影係改編自很出名嘅小說，係乜嘢打動到你拍成電影？
我當初睇呢本小說嘅時候，有兩個原因。一個係因為主角張雲林，呢個角色經歷過嘅事到佢嘅轉折，最後放下，睇小說嘅時候覺得好感動，呢個係感性嘅原因。理性嘅部份係，佢係時代片，又有花園，又有大場面，我就覺得應該係幾好玩嘅挑戰，亦從來未接觸過呢類戲。所以兩個原因加埋就想拍了。
Q：電影以日本侵佔馬來西亞嘅歷史為背景，處理劇本上有乜嘢要特別小心？
我處理劇本比較注意嘅係，我唔希望增加更多嘅仇恨。戰爭入面總會有好恐怖嘅事發生，而嗰啲都係以前嘅事，但都會好容易喺現代觀眾嘅心入面產生一個冇必要嘅仇恨。呢樣我會好小心，雖然我提到呢啲事，但我唔希望觀眾睇完出到嚟討厭日本人，係我唔想見到。所以嗰陣幾在意電影入面所有人都係平等，都有背後嘅原因。
（我睇嘅時候都忍唔住喊，見到啲日軍點對女性都覺得好難過…）
係，所以「出口」係好重要。就係呢部電影有冇俾主角一個「出口」，一個地方放下。因為如果冇嘅話，嗰份仇恨會留喺心入面。
Q：今次改編有冇加入或參考自己經歷過嘅事或感情？
我唔可以話加入自己過往嘅情感，而係因為我經歷過，所以更容易體會故事主角經歷嘅事。嗰份同理心放更大嘅時候，更理解呢個角色嘅時候，喺編寫或者同演員溝通嘅時候，都會比較清楚點去形容情緒。但我唔會話將自己過去啲乜嘢拎出嚟用，只係因為我有呢啲經歷，所以更能夠認同。
Q：「借時間」係故事其中一個重點，對你嚟講有咩事都需要靠時間去明瞭？
好多事都要，好多事都需要時間去拉成一個距離，然後回首嘅時候，知道係咩一回事。發生喺自己身上任何大事都係。不管係當年我哥哥走咗，我太太離世，呢啲都係多年後會慢慢去接受，然後變成某種正面嘅力量向前行。
Q：咁「借景」呢？可以同觀眾解釋多啲呢個概念嗎？
我覺得我嘅體會，就係阿部寬喺電影入面嘅一句對白：「外面嘅世界一直都喺度，我哋能夠控制嘅，係選擇點樣去睇。」係一份精神，一個面對世界嘅方式。
Q：電影中提到園藝、紋身等日本藝術，你自己對邊方面較有興趣或研究？
我特別鍾意日本漫畫，咁算唔算？哈哈！當然喺電影入面提到嘅其他日本藝術，都係因為拍戲而需要做研究。無論係佢哋嘅板畫定係紋身，呢啲都有特別研究。拍呢套戲之前我對呢啲都唔了解，要去學習。你可以見到點解呢啲藝術對日本嚟講係咁重要。好似阿部寬，佢飾演一個園藝師，仲要識紋身，但佢自己為角色嘅準備係學埋茶道，因為佢覺得一個園藝師一定識茶道。佢自己做完功課，經理人幫佢影低，你會見到阿部寬連點樣行入間房等等嘅動作，全部都有學過。所以每件事都係互相影響，佢哋對自己嘅藝術文化係有一種精神，而嗰份精神係幾令人敬佩。
Q：選角方面，一開始都想搵李心潔同阿部寬？佢哋有咩特質令你聯想起角色？
心潔係……電影公司接觸我嘅時候，佢哋就話想搵心潔。咁當佢哋話要搵心潔嘅時候，我梗係就話好呀，心諗「嘩！李心潔，好好嘅一個演員啊。」然後咁啱佢又係馬來西亞華人，好符合個角色。然後我就答「好啊好啊，冇問題。」佢哋就話「但係佢仲未應承啊，佢要先睇睇導演同男主角係邊個」，我話「冇問題。」然後再去搵佢傾。所以心潔就係咁搵返嚟嘅。
男主角係我想搵阿部寬，有好多原因嘅。我覺得阿部寬呢個演員好特別，他個型好特殊。佢仲有同觀眾之間嘅親和力，我覺得呢個同佢本身帶住一種溫婉有關。中村有朋呢個角色係個好「冷」嘅角色，係一個好唔容易接近嘅角色，你又要張雲林咁樣一個從日本集中營出嚟嘅人，要愛上一個日本人呢件事，你要搵一個好有魅力嘅人，唔可以隨便搵㗎。
所以嗰陣我就諗到阿部寬。當然另外一方面係，我自己身為一個電影觀眾，我知道呢部電影嘅日本角色百份之八九十都要用英文演出，咁電影公司就提出咗嗰啲我哋成日喺電影睇到、識講英文嘅日本演員。當然呢啲人名公司提過啦，但我從身為觀眾嘅角度，我就覺得我想要睇啲唔同嘅，想俾一種新鮮感觀眾，同俾我自己。因為呢兩個原因，我哋就搵咗阿部寬。
（咁佢係一睇咗劇本就答應？）
佢係日本人，邊有可能咁快？佢哋做嘢好謹慎。佢係睇咗劇本，我哋仲有私信，佢仲睇咗我之前嘅電影作品。好彩嘅係，我之前嘅電影喺日本上映過，所以都有日文字幕版本，佢可以好輕鬆咁睇我之前三部電影。所以就係佢睇完劇本，我寫咗封信俾佢，同佢講我點解想請佢嚟演出。係花咗一段時間嘅。
（所以係要用好大嘅誠意…） 係嘅係嘅。
Q：電影有好多唔同國籍嘅演員，溝通會唔會有咩困難？拍攝時有咩趣事？
都還好嘅，阿部寬需要有翻譯，因為我唔識日文嘛，但係除咗呢個之外，我覺得因為全世界嘅電影人有一個共同點，就係當我哋有足夠專業嘅時候，我哋有一個共同語言 － 電影，即係cinema language。所以大家其實都知道要做啲咩嘅時候，唔需要太多溝通。我哋一開始都講好咗係要達到點樣嘅目標、要拍一套點樣嘅電影之後，其實大家都知道自己要做咩。所以同其他演員溝通起嚟其實都幾輕鬆，當然仲有我自己英文ok，所以可以同英國演員直接溝通。
Q：電影中有冇邊句對白你特別鍾意？
我突然諗到嘅係，李心潔同阿部寬佢哋兩個人喺度講藝術嘅時候，心潔話學一種日本藝術就夠，阿部寬回應話藝術係冇邊界嘅。心潔再話，你嘅藝術來自於你嘅文化，文化係有邊界嘅。我一直都幾鍾意呢句說話。
（點解？）
因為好真實啊！因為文化係我哋人同人之間面臨緊嘅一個困境，我哋能夠透過乜嘢去了解同稅己唔同嘅人。我們帶住太多嘅先入為主、太多嘅不解去睇同自己唔一樣嘅人。咁樣係一個好殘酷嘅事實。咁但係當然我會希望藝術、希望愛，係可以跨越呢樣嘢。如果唔係，你就一直都帶住咁樣嘅歧視，喺你唔了解呢個人、身為一個人之前，你就因為他係點樣嘅一種人而完全定義對方。呢件事我覺得係幾可惜，而且係幾恐怖嘅。我覺得就好似喺呢度（香港）發生緊嘅事咁，已經劃分成兩種人，然後兩邊嘅人睇對方，「你就係嗰種人」，你唔係一個 個人、唔係一個個體，而係代表一邊，咁樣係永遠唔會有對話、理解。
鳴謝：場地 – Eaton HK
文：Janis H., Angle
