到底 Marvel 邊個角色有機會拍獨立電影？
到底 Marvel 邊個角色應該拍獨立電影？雖然 Marvel 已經有哂咁多英雄電影嘅時間表，但係又有邊個會估到 Marvel 突如其來嘅安排呢？所以每一位電影嘅配角，都有機會好似《黑豹》咁成為獨立電影嘅主角！我哋今次就揀咗六個人氣角色，包括：冬日戰士、飛隼、紅女巫、黑寡婦、洛基，同小樹人，分析邊個最大機會成為獨立電影嘅主角！
先同大家講明今次嘅評論係基於角色嘅個人魅力、能力上的發展及應用以及背景故事可發揮的空間所考慮，以下將會由最大機會嘅人物開始講起。
第一名：冬日戰士
係《美國隊長2》中大放異彩嘅冬日戰士，憑著一隻鐵臂及高火力武器，重創神盾局局長；當中喺天台單手接美國隊長鐵盾一幕亦留下深刻印象。單論個人魅力嚟講，冬日戰士自己亦可以擔起大旗當正做主角。
而就能力嘅發展嚟講，冬日戰士除咗超人體質同埋鐵臂，係無其他能力嘅。就正正係因為咁。觀眾對佢唔會留下固定嘅印象，造就更多可觀嘅動作場景，例如冬日戰士手持小刀同隊長係橋上面打鬥個一場戲。至於故事發展方面、冬日戰士不論喺《美國隊長2》之前，或者《美國隊長3》之後，都有好多嘅發展空間。喺《美國隊長3》過後，冬日戰士鋼臂被毀，相信獨立電影可以交待其後發展，加上佢喺漫畫中與美國隊長有千絲萬縷嘅關係，所以無論如何，Marvel 都會好好交待冬日戰士嘅事～
第二名：黑寡婦
其實一早就有黑寡婦出獨立電影嘅消息架喇!不過一直都未有進一步落實，根據施嘉莉祖安遜親自回應，問題在於落實嘅時間。因為Marvel 每一個計劃都需要幾年時間，如果拍得成已經係Marvel宇宙嘅第四階段，一黎可能會同第二、第三階段嘅角色爭拍獨立電影，二黎可能演員本身都怕著唔落緊身衣喇。但客觀黎講，不論係角色形象，或係劇情上嘅發展都非常適合拍獨立電影。
第三名：紅女巫
作為萬綠叢中嘅第二點紅，人氣不下於黑寡婦嘅紅女巫，自自然然成為榜上三甲之一。雖然紅女巫本人曾表示拍獨立電影嘅機會不大，但係憑著紅女巫的人氣，加上角色設定上紅女巫既係avenger又係mutants，如果拍得成獨立電影將會衍生更多嘅合作機會。如果有獨立電影，如無意外就一定係講House of M。
至於其他幾名就集中講啦。雖然其餘三位都有足夠嘅人氣，但係可以發揮嘅劇情似乎有限。例如洛基嘅故事本身已經喺《雷神3》＆復仇者聯盟3（假如有）到完，加上Marvel 從未為奸角拍過獨立電影，所以大家要好好珍惜見到洛基嘅機會喇。而飛隼雖然每一集都有新裝備，但係人氣上未及以上咁多位，加上故事上由退役軍人到成為飛隼都係大銀幕上出現，所以係之後都應該繼續成為助拳嘅角色。而最後嘅小樹人行可愛路線，同Marvel 拍獨立電影路線相距甚遠，所以應該會係成為官方短片嘅主角。
到最後會唔會有人問點解無提過鷹眼呢？
文：六仔
