Browsing Tag

I’M

電影專題

《逆向誘拐》電影製作日記（二）進擊的曾江

-拍攝首日- 20161019 I'M：《逆向誘拐》正式開鏡第一天～今日我哋嚟到香港公開大學拍攝一場記招嘅花絮。電影拍攝嘅辛酸史聽唔少，但真正現場睇真係第一次，亦終於體驗到「台上一秒鐘，台下十年功」嘅道理。 靈光：真正嘅第一場戲其實喺「日班」就已經拍完，我哋去到公開大學嘅時候係「夜班」，要等導演佢哋喺上一個拍攝場地嗰邊趕過嚟，所以就首先睇下現場嘅工作人員點樣係短時間之內將一個會議室改裝成為身處美國嘅記招場地。 I'M：見到有人開始喺會議室 set up，度好位置貼上戲中一間上市公司嘅logo，仲有一大堆記招用嘅咪牌已經stand by。走出會議室，終於見到製作團隊嘅人員陸續現身～這邊廂嘅工作人員幫演員化妝set頭，那邊廂我哋認識咗一位負責收音嘅哥哥同埋導演嘅助手，又見到演員開始練對白。大家不斷進進出出，我哋就盡量搵有利位置紀錄每個單位嘅狀況。 靈光：今晚場戲由於係講「植氏集團」喺美國開記招，除咗對白係講英文之外，亦都真係有幾位金髮嘅臨時演員幫手。未埋位嘅時候佢地同工作人員仲一齊討論佢地識講幾多廣東話！ I'M：而今日演員陣容之中有一個重量級人物，就係「立即變黑晒亦得，得咗」嘅曾江！我係第一次面對面接觸呢位好有霸氣嘅影帝級人馬～有人話曾江總係有種囂張傲慢嘅森嚴，哪怕係笑，亦都比人覺得氣場強大。雖然我亦都一直相信曾江就係咁，但當日我感受到嘅，係佢另外一面。 靈光：為大家揭開曾江嘅A面同B面～ I'M：踏入會議室嘅佢左望右望視察場地，眼見各單位忙住準備，應該仲有排搞，就話要同助手落咗樓下飲杯嘢休息下。 靈光：跟住曾江真係落咗樓去飲杯嘢。 I'M：過咗大半個鐘之後，佢又上番嚟。 曾江：「吓？仲未得呀？吓？又要落去飲杯嘢呀？」 靈光：到差唔多 ready 開機，唔經唔覺成個會議室都係人同器材，開始感受到拍戲嗰一種大陣仗。呢個時候我哋就捕捉到佢同一個 cam man 傾計嘅一幕。 曾江：「嘩，乜而家已經變到咁㗎嗱？咁就得㗎嗱？啊⋯⋯」 靈光：曾江眼前嘅攝影機相當之細部，難以置信會用呢部機去拍電影。之後導演解釋因為呢一場戲其實係一個電視畫面，咁樣拍先有導演想要嘅質感～ I'M：呢位已經年屆82嘅老前輩，仍然對每件新奇事物非常之好奇，問東問西，到真正拍攝嘅時候對大家嘅擺位都有唔同意見添～ 曾江：「咁樣⋯⋯即係點⋯⋯咁即係咩意思呀⋯⋯」 I'M：我腦入面即刻浮現導演嘅一句說話：「我哋都控制唔到佢㗎～佢拍嘢嗰陣就係導演嚟㗎喇！」旁人睇可能會覺得佢諸多意見，但我睇到嘅，係佢滿滿嘅求知心！直到會議室場戲終於拍攝完畢，雖然戰戰兢兢，但係我哋理唔到咁多，快手快腳喺曾江離開之前訪問一下佢。 曾江：「吓？做咩呀？咩呀？講咩呀？」 I'M：見到佢嗰種真性情，我真係忍唔住偷笑咗一下。喺佢兩分幾鐘嘅短訪入面，我完全感受到佢仍然係抱住一種學習嘅心態去拍戲，活到老，學到老！咁有經驗嘅人話畀你聽人生仲有大把嘢要學！ 靈光：到同大明星影相嘅時間～ I'M：「可唔可以同你影張相呀？」 曾江：「影相？同我影相要收錢㗎喎！」 I'M：「咁幾錢先？」 靈光：1，2，3，笑～ I'M：不得了！呢位老人家實在太可愛！可愛得嚟又不失佢充滿霸氣嘅形象，實在有趣！ 靈光：咁你最尾有無畀錢？ 按此重溫《逆向誘拐》電影製作日記（一） 文：靈光 https://www.facebook.com/huxtin/ 靈光一閃，正在尋找《光影星碎》後的《生死幻願》。…

01/11/2016