揭開 黑寡婦 迷一般的過去 拆解最強敵人「模仿大師」絕技
全球影迷期待已久，為Marvel電影宇宙第四階段打頭陣嘅《 黑寡婦 》個人電影現已上映！《 黑寡婦 》故事線發生於《美國隊長3：英雄內戰》同《復仇者聯盟3：無限之戰》之間，當時復仇者聯盟正陷入分裂之中，當時有好多反對《超級英雄註冊法案》嘅人都被囚禁，亦有人正在逃避追捕，由性感女神施嘉莉祖安遜（Scarlett Johansson）飾演嘅「 黑寡婦 」娜塔莎羅曼諾芙（Natasha Romanoff）正正就係在逃英雄之一。
《黑寡婦》電影劇照
黑寡婦的內心世界與過去
大家都知「黑寡婦」呢個角色有黑暗嘅過去，但呢啲些過去點樣影響佢喺Marvel電影宇宙中嘅存在？導演姬蒂索德蘭（Cate Shortland）表示，終於有機會可以解開呢個角色嘅生命軌跡。施嘉莉祖安遜話：「我對呢個角色非常了解，因為佢就喺我生命之中，但就從來無機會去了解佢嘅過去，導演姬蒂今次希望探索角色內心，令我有更多機會去深入角色嘅唔同面向，對我嚟講就好似是一個治療過程， 你好難想像有演員演出一個角色成十年咁耐，仍有機會發掘角色嘅唔同面貌。」
《黑寡婦》電影劇照
另一件意想不到嘅事情當然係「黑寡婦」竟然有「家人」！科倫絲佩芝（Florence Pugh）飾演嘅葉蓮娜貝洛娃（Yelena Belova）同娜塔莎已有20年無見，科倫絲話：「葉蓮娜係一個外向型嘅女仔，佢鍾意講出自己嘅諗法，過去被訓練成殺手，完全唔知道點樣好似普通人咁生活，佢雖然係致命武器但同時好似個小朋友咁。」所以葉蓮娜就好似係娜塔莎嘅一個對比，葉蓮娜嘅率真同果斷，反而激發出娜塔莎人性嘅一面。
《黑寡婦》電影劇照
「黑寡婦」本身無超能力，所以今次電影加入咗大量動作場面，而每個角色都有獨特嘅戰鬥場面。好似飾演「黑寡婦」嘅妹妹科倫絲佩芝就特登喺拍攝前就特別學習跆拳道、刀仔技擊等特別技能。
《黑寡婦》預告截圖
今次「黑寡婦」首度以白色戰衣示人，原因係今次「黑寡婦」會喺冰天雪地嘅西伯利亞出戰，為了增加保護色，劇組認為以白色作為戰衣係一個突破新嘗試。
《黑寡婦》電影劇照
可以使出復仇者絕技嘅「模仿大師」
特務組職「紅室」嘅神秘刺客「模仿大師」（Taskmaster）就係「黑寡婦」今次面對嘅最強對手，佢有超強模仿能力，睇一次就能學識敵人嘅絕招，仲預測到敵人動作，令「黑寡婦」非常頭痕！「模仿大師」除咗學識「黑寡婦」嘅絕技之外，喺預告片中仲可以睇到佢會使出復仇者聯盟成員嘅獨門絕技，好似「美國隊長」嘅踢圓盾動作、「鷹眼」射箭絕技、黑豹嘅伸爪動作等，未知佢喺電影入邊還會使出邊個復仇者聯盟嘅絕技，睇戲時真係要落足眼力留意！
買飛及睇場次： https://bit.ly/3rWKh5Q
