《犯罪現場》導演兼編劇 馮志強 訪問 近年最欣賞嘅電影劇本係⋯
香港電影編劇家協會除了每年頒發兩個「年度推薦劇本獎」外，去年增設「最佳角色演繹獎」嘉許表現出色的演員，但一個成功角色的誕生，編劇功不可沒，因此今年獎項將易名 為「年度最佳電影角色獎」，同時表揚參與創造全年港產片最佳角色的編劇及演員。協會副會長 馮志強 近日接受 Hong Kong Movie 專訪，大談對獎項及創作的看法。
1. 好少獎係演員加編劇一齊攞，可唔可以簡單介紹下「年度最佳電影角色獎」？
呢個係香港編劇家協會今年新增設嘅獎項嚟。我哋設計呢個獎時，係由編劇會嘅角度出發，冇分主角定配角。舊年就有個叫「最佳演繹獎」，但我哋覺得如果由創作角度睇，選一個年度最佳角色會比較適合。一個角色嘅設計其實係來自編劇同演員嘅共同努力，所以我哋提名名單以演員同編劇為一個組合。角色係以創作角度去選，然後編劇會會員一人一票選出嚟。
2. 演員喺角色設計上，通常喺邊個方向付出？
編劇創作就係以文字開始啦，有咗個確實演員之後，無論外形或者佢演出嘅節奏、聲線等等都係將角色立體起嚟一個好重要嘅過程，咁其實係演員創作過程嚟。即係有時可能句對白係由文字寫出嚟，但通過演員嘅口講出嚟呢，佢自己獨有嘅節奏係可以演活角色。
3. 另一位編劇陳詠燊有講過，呢個獎係唔分男、女，甚至死物都可以，你可唔可以就呢個講法講解下？
因為我哋編劇會覺得，如果真係要選角色就唔應該規限於男或者女定係動物，因為一個角色嘅設計，例如你話小Q，其實佢係一個好重要嘅角色嚟。雖然係一隻狗去飾演導盲犬，但背後都有編劇嘅設計，佢都有性格，係有血有肉嘅角色。又例如《大偵探福爾摩斯：逃獄大追捕》，雖然佢冇演員親身去演釋呢個角色，但都係角色。所以一定由角色出發，如果《大偵探福爾摩斯：逃獄大追捕》贏就會係編劇同聲演嘅配音員去得獎。
（問：咁死物呢？）我剩係諗到《劫後重生》個排球，咁算唔算？
4. 近年有冇咩電影獎項你比較深刻？
A: 近年Movie6呢個獎（MOVIE6全民票選電影大獎）都好有意思，因為佢係一個睇場次、買飛嘅App，代表咗一啲真金白銀買飛入場睇戲嘅觀眾，係一個幾有代表性嘅獎。
5. 請你介紹下《犯罪現場》林法樑呢個角色，評價張繼聰點樣演繹你寫嘅角色
林法樑其實對比傳統、好勇猛嘅警察係另一個極端，佢只當係一份工，準時返工、放工係好緊要。佢將所有精力放咗喺照顧流浪動物身上。因為佢愈對得人多，就愈鍾意動物。係一個反傳統警察。就偏偏遇到個超級大賊，就係古天樂飾演嘅汪新元，特登有個咁嘅對比。
點解要設計佢咁鍾意動物呢，因為戲入面有個關鍵目擊者，就係隻鸚鵡，佢睇到成個凶案嘅經過。就係因為林法樑鍾意動物，所以佢會睇到呢個空隙。由鸚鵡去破案，成個設計就係咁嚟。
搵張繼聰嚟演之後，我覺得近年大家睇佢嘅喜劇演出都係好出色。但我覺得佢唔止演喜劇好，因為大部份演喜劇嘅人，演任何戲都得㗎了。張繼聰近年嘅狀態更加係一流，所以特登透過呢個角色，將佢拉到更闊嘅演出空間。當然佢個人嘅節奏，或者係好多情緒嘅把握，都係做得非常之好。佢係將我寫嘅呢個角色大大提升咗。
6. 入圍名單有冇邊啲角色／演員你自己係好欣賞？
我冇睇哂咁多部戲，我睇過嘅印象中，《獅子山上》嘅衛詩雅係做得幾唔錯。佢係林德順嘅太太，佢見到先生腳受傷之後，成個心理狀態變化都係做得好好。其實佢努力咗好多年，都係一位好好嘅演員。
7. 設計角色要諗到幾仔細？定係會設計得空泛少少，俾演員自己幻想、發揮？
我寫嘅時候會諗得盡量仔細，有幾仔細得幾仔細，未去到出生月日嘅，除非特別有戲劇喺上面。但例如角色性格、喜好、身邊嘅人，什至造型，我都會寫。因為我覺得編劇有責任去設計。然後到同演員溝通嘅過程，咁因為我本身都係個導演，可以貫穿導演、編劇同演員嘅溝通。當然最後無論寫得幾仔細，最尾都要通過演員去演出。對白寫得幾精彩都好，都要演員講到出嚟，先有嗰個效果。
8. 角色靈感通常嚟自邊度？係咪會照住心水演員設計？
通常如果我自己原創嘅故事，次序係主題、角色、事件。我都會係由成個戲嘅主題開始。要表現呢個主題需要啲咩，自然就會有需要嘅角色出現，我係用呢個方法。又以《犯罪現場》為例，入面講緊個主題就係人人都有機會犯罪，所以設計咗張繼聰呢個角色，佢同古天樂嘅角色啱啱係一個對比。古天樂係一個犯過罪嘅人，張繼聰係一個有機會犯罪嘅人，其實係行同一條路。 所以基於主題，所以設計兩個咁嘅角色，透過佢哋嘅衝突去呈現主題，亦因為咁有相對性格出現。
有句說話：「三流電影講情節，二流電影講人物，一流係主題同世界觀。」
9. 近年有咩電影嘅劇本或電影角色特別欣賞？（咩國家嘅電影都得）
《我不是藥神》真係好好睇。《淪落人》都寫得好好
10. 有咩角色想寫，或者好難寫得好？
所有未寫嘅都想。我怕悶，盡量唔想重複，對演員都會係挑戰。
11.會唔會有電影你睇嘅時候覺得好差， 但知道其實劇本係寫得好？
唔會，因為通常劇本差，套戲一定差。有嘅通常係條橋，你覺得好有發揮空間，但最後覺得浪費咗。
文：SC, Janis H.
