獨家專訪《 反斗奇兵 》攝影指導 Patrick Lin （上）
Hong Kong Movie X 跨媒體創作人Eddy，獨家專訪 Pixar（彼思）的攝影指導（Director of Photography） Patrick Lin 。
Q: Toy Story 4入面你自己最鍾意邊拍部分？點解？
A: 我最鍾意係拍嘉比嘉比同小叉一齊嘅戲份。因為佢兩個嘅性格好極端，所以當佢哋一齊嘅時候，場戲可以由恐怖到幽默，甚至感動。
跨媒體創作人 Eddy Hui Fan Art作品
Q: Toy Story 4入面邊部分最難拍？點樣去解決？
A: 電影裏面嘅第二幕戲係描述胡迪由安仔轉至寶妮嘅生活世界。表面上只係一個鏡頭，但其實我們用咗九個唔同場景加唔同時間、鏡頭，天衣無縫咁剪接埋一齊。每一格菲林都係由我哋嘅Camera & Staging Artist James Campbell 精心編排。佢足足用咗超過三個月，完成呢一幕1分40秒嘅戲。
Q: Toy Story 4入面有好多唔同嘅場景，點樣去拿捏鏡頭嘅控制而造到大家滿意嘅效果？
A: 《反斗奇兵4》嘅拍攝原則係「真人攝影師拍攝玩具」，唔係「玩具攝影師拍攝玩具」。如果一個鏡頭胡迪要行十步，咁攝影機就要感覺只需要行兩部。而且攝影機嘅重量同移動方式都要盡量模仿真實世界。
Q: 大家睇Pixar動畫嘅時候都好鍾意見到啲「彩蛋」，依啲「彩蛋」係由咩人負責決定？
A: 有好多人會一齊參與彩蛋嘅決定。由導演、美術指導，到電腦模型師同佈景設計師都會參與。
Q: 除左動畫師，你有無份參與呢啲「彩蛋」嘅擺法？有冇特登放喺難搵嘅地方等大家去搵？
A: 大部份彩蛋都只係喺背景，通常係等到拍攝完之後先放入去。只有個別情況，例如涉及攝影機嘅編排，我嘅團隊先會參與。我唔想戲透，但可以俾個提示你，今次 Pizza Planet Truck 變咗係一個紋身。我哋拍攝嗰陣當然會確保觀眾會見到，但又唔可以太明顯。
Q: 對於有份參與一套經典動畫終於去到結局，有咩感受？
A: 《反斗奇兵》系列係Pixar嘅靈魂精粹。之前每一集都係一套勝一套，尤其係《反斗奇兵3》嘅完美結局。為咗保持《反斗奇兵》系列一貫嘅水平，拍攝過程由始至終都係艱苦嘅戰鬥，背負上呢個龐大嘅責任，壓力同焦慮係難免嘅。但依家見到電影受到廣大觀眾同影評人嘅愛戴，終於可以鬆一口氣。
本專訪已獲Pixar Animation Studios授權。
