《 羅馬 》關於一生最重要的女人 金像導演艾方索柯朗專訪
點解電影叫《 羅馬 》(ROMA)？
「ROMA」其實係一個叫做Colonia Roma嘅城市，亦都係拍攝嘅地點。其實《ROMA》唔係本身嘅戲名。我寫劇本嘅時候，呢部作品係叫做《CLEO》。製作團隊當中無人睇過個劇本，我無畀過任何人睇，而製作團隊開始要搵拍攝場地，好多場景都喺Colonia Roma度拍，於是我開始叫呢個拍攝計劃做《ROMA》，久而久之大家都叫佢做《ROMA》，就索性將戲名改做《ROMA》。
你一生有好多好重要嘅人，點解特定為Cleo創作一部電影？
因為喺故事世界層面，Cleo 係我創作生涯裡面最偉大嘅一個角色，比我媽媽更加偉大。而且，作為一個真人，Cleo 總係愛人遠超於愛自己，完全無私奉獻，所以我絕對要向佢致敬。
《羅馬》係一個關於你自己嘅故事，你點樣令演員了解到自己嘅世界，又達到你嘅期望？
無人手上有劇本，成個創作都係重演我嘅回憶。拍攝嘅地方同回憶中40年前嘅地方幾乎一樣。我專登揀同我細嗰認識嘅人外貌同體形非常相似嘅演員，而且著一樣嘅服飾，畀到我似曾相識、心領神會嘅感覺。另外，我哋係完全順住時間線拍攝，所有演員都要慢慢了解同慢慢投入角色，但係又唔知下一日會發生咩事，就好似我哋一生都唔知聽日事。我嘅計劃係要演員對製作有一個大概了解嘅情況之下，令佢哋個人嘅期望與現實產生衝擊。
電影入面有邊部分係真實事件？
電影裡面八成嘅畫面，當中有九成都係嚟自我或者係Cleo嘅回憶。屋企入面嘅環境、物件，100%都係嚟自我嘅回憶。將我同Cleo嘅回憶放埋一齊，感覺良好，只有好少場景係虛構出嚟，用嚟展現家庭生活以外嘅心情。
（海邊一幕都係真實嘅？）
係，我同我妹妹遇溺嘅時候係Cleo救咗我哋，而Cleo都真係唔識游水。
電影中有一幕，大家都救緊火嘅時候，有個男士突然清唱一首歌，可唔可以介紹下首歌同原因？
呢一幕係我其中一段回憶。我細嗰嘅時候，喺同一個社區，大家好似一家人咁。社區裡面有好多同外國人結婚而變得好有錢嘅墨西哥人，其中就有個女人嫁咗畀挪威男人。每年嘅新年，我哋都去佢哋屋企作客，嗰個女人都會打扮得好靚，仲以歌會友。我以前唔明點解，之後先知呢個係挪威嘅傳統。過往大家喺慶典都會著一啲傳統服飾，宜家都會，但已經演變到好似萬聖節咁，會扮成吸血鬼等等。嗰首歌其實就呢個傳統嘅一首歌，主題同家鄉有關。
《羅馬》著重喺兩個女人身上，一個女傭同女僱主–有4個仔女嘅媽媽，描寫佢哋面對困境時堅毅嘅心態。你係咪都刻意想表達女性主義呢樣嘢？
其實冇。我係想講兩個照顧我長大成人嘅女人，兩個我最親嘅人，一直伴隨我一生。以前佢哋必須獨立、堅強。我冇諗住表達一個立場，但如果大家睇完《羅馬》有呢個諗法，我會受寵若驚，會非常開心，因為我認為男士唔能夠真正表達到一個女性主義立場。
訪問：Janis H., SC
文字：Janis H., 靈光
