獨家專訪《 反斗奇兵 》攝影指導 Patrick Lin （下）
Hong Kong Movie X 跨媒體創作人Eddy，獨家專訪 Pixar（彼思）的攝影指導（Director of Photography） Patrick Lin 。
Q: 做到依家 Toy Story 4，你覺得自己拍攝動畫有冇新嘗試或者進化?
A: 其實我第一套擔當攝影指導嘅動畫片係2004年嘅《超人特工隊》。呢15年內有好多技術上嘅進步，例如Pixar自創嘅動畫軟件Presto令我哋拍攝動畫嘅手法同拍攝真人電影嘅手法更加相似。我哋亦更加掌握到 Camera Motion Capture 嘅技術，令到攝影機移動時會更加自然。最後就係我哋首次喺製作過程中運用Virtual Reality，令到導演、美術指導、佈景同攝影組可以一齊參與設計。
Q: 由拍真人電影轉做拍動畫，難適應嗎？用鏡頭講故事有咩分別？
A: 喺藝術上拍攝真人電影同電腦動畫係冇太大分別。一個廣角鏡頭就係一個廣角鏡頭，一個近鏡就係一個近鏡。大家都係用同樣嘅電影語言嚟講故事。
Q: 有冇邊套自己有份參與嘅動畫製作覺得最滿意／最難忘？
A: 好難答，好似問緊邊個係我最鍾意嘅仔女咁。我鍾意每一套我有份參與嘅電影，不如簡單咁講我非常滿意《反斗奇兵4》嘅製作，亦對於我嘅製作團隊能夠將電腦動畫拍攝推到另一巔峰，感到好自豪。
Q: 除咗自己有份參與嘅製作，最喜愛係邊部動畫？啟發得你最深、好impressive嘅又有邊套？
A: 不論係動畫定真人電影，只要係一套好電影都可以啟發到我。但我最鍾意嘅動畫係今敏嘅《千年女優》。
Q: 喺Pixar入面工作有咩獨特嘅傳統？作為香港人，有乜嘢你想帶入去Pixar?
A: 我唔知呢個算唔算係獨特傳統，但最深刻印象係每個人喺Pixar都以「講故事」作為工作嘅大前提。例如喺《反斗奇兵4》嘅古董店裏面，每件貨品點樣擺、塵封喺邊個角落都會有段故。呢啲故事能夠令古董店增加一份歷史性，令佢更加真實可信。香港係一個多元文化嘅社會。我喺香港長大，由細到大受到嚟自香港、日本同美國嘅電視、電影以及流行文化所潛移默化影響。我希望可以喺所有我有份參與嘅Pixar電影裏面，注入少少多元文化嘅感覺。
Q: 有冇留意香港本土嘅動畫？有咩特別之處？有咩寄語香港嘅動畫師？
A: 我有幾個朋友啱啱製作完《大偵探福爾摩斯 逃獄大追捕》。好開心見到香港咁多有天份又有才華嘅藝術家同動畫師。希望今個暑假我會有機會睇到呢套戲。
Q: 日後如果要你自己創作一個動畫故事，你會以咩嘢做題材？想帶咩訊息俾觀眾呢？
A: 我鍾情科幻同黑色電影。希望可以將呢兩種唔同類型嘅電影合而為一，拍一套黑白嘅偵探電影。
本專訪已獲Pixar Animation Studios授權。
