姜皓文為演《翠絲》 曾著女裝睡袍出街 「諗返起部戲都猶有餘悸」
黑哥 姜皓文 憑《翠絲》入圍今年第38屆香港電影金像獎角逐影帝，而早前他於「第二屆 MOVIE6全民票選電影大獎」獲得「最佳男主角」的獎項，率先成為「民選影帝」。黑哥為演《翠絲》中佟大雄一角，放下一貫男子氣概「爆棚」的形象，為觀眾帶來驚喜。訪問中再次提起這部戲，黑哥竟形容是「猶有餘悸」，更說「我想脫離咗好耐啦！」
1. 你以往演嘅好多都係剛陽味甚重嘅角色，今次出演《翠絲》係有咩契機？
因為古天樂先生有次問我想做乜嘢角色，跟住我話我要做好多㗎喎，又要拍愛情片啊，又要拍啲咩片咩片⋯⋯跟住佢話：「唔好啦，不如你咁啦，我有個幾好嘅劇本，你做女人啦！」之後我就開始認識咗舒琪老師，聽佢講完個故仔，覺得都幾得意同真係未演過，就去接咗啦。接咗之後係有啲棘手嘅，因為完全唔知跨性別人士係咩東西，於是開始去了解。
2. 佢哋有冇講過點解會搵你做依個女人角色？
因為我夠男人囉！即係佢想搵一個上落大啲嘅，男人味好重嘅人去做跨性別人士，去演一個女性化嘅男人。
3. 收到邀請時有冇覺得好意外？
好意外啊！意外到估唔到，意外到好難做啊！上咗手之後發覺係難嘅，依家諗返起都有啲心慌慌。我想脫離咗好耐啦，依家戲又上完，好多嘢都過晒啦，唔想再提依件事。但咁啱金像獎有個咁好嘅提名，又提返依啲事，係有啲猶有餘悸、驚心動魄嘅感覺。
4. 當你第一次睇完《翠絲》嘅劇本，當下有咩感覺？
好正囉！好正，佟大雄個角色寫得好好，成個故事骨幹同發展係非常之好。我哋依部唔係普通嘅商業片，佢係一部非商業嘅電影，講唔上係藝術片，但你唔可以用商業眼光去睇依部戲。演員嚟講都唔可以用商業手法去演，所以我哋演嘅時候係有啲冒險嘅，因為同我哋平時接觸嘅劇本同電影根本係兩樣嘢。好似我嚟講，我從未試過去演一個咁嘅劇本同咁類型嘅戲。
5. 有冇因爲《翠絲》依部戲，收到觀眾啲咩意見？
依部戲係，鍾意嘅會好鍾意，唔鍾意會好憎你咁樣。我拍緊嗰時，差唔多上映做宣傳嗰時，接到好多好多Facebook或留言無數嘅人去鬧我。佢哋可能對依種觀念唔理解，有可能用咗第二個眼光睇依樣嘢，覺得你係做緊唔正當嘅事，即係話：「好地地一個男人做咩做女人啊⋯⋯」諸如此類，我受過好多依種批評。
6. 當你受到輿論時，心情係點樣？
冇啊，你都要接受㗎！好嘅要聽，唔好嘅都要聽，你咪自己去分析吓囉。初初唔知係有啲唔開心嘅，大家咁努力去創造一個角色，去做一件事出嚟，其實真係唔簡單。《翠絲》依部戲上上下下，製作部、演員部到所有後勤，全個團隊都覺得係一部好戲，大家都為做咗依部戲而感到驕傲。但點解有啲人仲會去偏激地講依啲說話？自己再諗返一層，係嘅，的確會有人鍾意有人唔鍾意。
7. 當中有冇特別深刻嘅意見？
有㗎，有啲講到好深入好狠㗎，「唉！姜老師，我真係好崇拜你㗎，你係一個好演員，但你唔好演啲咁嘅戲啦，如果真係有個男人去聽，睇完你部戲去做咗女人，你過唔過意得去呢！」類似係咁，係會覺得有啲「使唔使啊？」咁樣囉。即係好似頭先我所講，我哋係幾冒險嘅，包括我嘅演法都係從來未試過以唔商業嘅底下去演一個角色。
我演之前認識好多跨性別人士，好似丁丁同佢啲朋友，我哋全部傾過計。好多人入場睇到一個花枝招展嘅姜皓文，會誤解一個跨性別人士係咁，但其實佢哋係一個麻甩仔嚟㗎。佢哋舉手投足都唔會好女性化，只係心態係一個女人。雖然有時係女性化，但大部分時間係一個男人嚟。佢哋坐都未必好似海報上咁嘅，依啲坐法係我唔想太貼地，太真實。電影始終有啲娛樂性觀眾先有興趣，所以加返啲女性化嘅肢體動作，其實佢哋真實唔係咁。
8. 拍《翠絲》會唔會特別需要做好多功課？
會啊，所以我哋同班跨性別人士傾好多計㗎，甚至做咗朋友。佢哋講心路歷程畀我哋聽，我又去睇吓啲書，去了解真係女性化嘅嘢。我試過真係著咗件女人衫，好似睡袍咁嘅嘢，落茶餐廳食飯，睇吓路人咩反應、用咩眼光去望我。不過啲人冇乜理你㗎，係後面有對夫婦話「麻甩仔嚟㗎！」咁樣囉，哈哈！其實冇乜嘢，多數市民眼光都係平和嘅，即使有咩都係望吓笑吓算，香港人就係容易接受又容易忘記。
9. 《翠絲》入面，有冇邊場戲特別深刻？
好多都好深刻㗎，但有啲剪咗呢。因為我哋條片太長，好嘢太多，哈哈，放唔晒落去。有一部分係Tracey出咗去打工，離開屋企，喺街畀啲流氓當女咁撩。夜媽媽抽住好多嘢，著住高踭鞋，啲流氓又揭裙啊，欺負佢。嗰場戲好好睇㗎，不過剪咗囉。仲有段係Tracey去咗咖啡店打工呢，做咗咖啡女郎，然後仔女嚟探佢，好感動嗰場。
10.拍完《翠絲》後，對女性睇法有冇改變？
我幾驚對女性冇咗興趣啊，因為太清楚啦，哈哈！拍完之後係幾佩服女性嘅，原來佢哋做啲嘢係唔簡單，戴個Bra都唔簡單，自己戴手又唔知點樣撓，又要「摀」低身咁。著住嗰對高踭鞋去行斜路係幾難受嘅，啲腳「累」晒喺前面嘅感覺係幾難頂。我哋拍嗰陣班女同事都當咗我係姐妹，有一次拍戲條Bra帶斷咗，佢哋都話「用住我依條先！」義不容辭啊！
11.《翠絲》、《淪落人》、《G殺》…今年金像獎有好多新導演嘅作品有份提名，你覺得依啲新導演同你以前合作過嘅導演有咩唔同嘅地方？
我係非常樂意同喜歡同新導演合作，佢哋嘅想法你係意想不到嘅。佢哋去睇姜皓文嘅眼光，我係從未見過其他人咁樣睇我。因為有啲新導演呢，完全唔知我係邊個，未睇過我啲戲又有，唔識我又有。佢哋會有另一種新諗法，新到連我都問返佢，「導演，得唔得㗎？」但出到嚟又得㗎喎！我幾鍾意依種撞出嚟嘅新火花。通常導演睇你會有一種諗法，你諗自己又會有另一種做法，所以永遠導演嘅想法係出乎意料之外。
服裝： Degaia_HK
髮型： Jove Shek@La Môd Salon
化妝： Herrylaiming Make-Up
文：SC
