【 MOVIE6 熱話】《逆向誘拐》電影製作日記（三）拍戲唔簡單

Posted on 15/12/2016

-拍攝第二日- 20161023
I'M：朝早我哋嚟到中環贊善里一間叫「微熱山丘」嘅餐廳，聽講佢哋出產嘅鳳梨酥好似好好味㗎～ 不如講番重點？
靈光：好！今日故事最關鍵嘅12位演員都喺晒到喇～
I'M：真係超人齊！ 靈光：拍街境無遮無掩，不斷都會有途人經過，大家都偷偷望吓發生咩事，原來拍戲都唔係真係咁神秘。 靈光：呢一日除咗係拍街景，仲係影硬照嘅日子，電影海報都應該喺同一日拍埋。大熱天時，個個着長袖衫擺 pose，睇都覺得好熱，但係演員係專業嘅！
I'M：拍攝其中一個鏡頭要所有人都喺鏡頭前俯視向下望，而呢個鏡頭都要hold住差唔多十五分鐘，眼見佢哋大汗揼細汗，泰臣直頭倒水咁😂加上天氣比較焗熱，真係好辛苦～ 靈光：明明 book 咗贊善里一間餐廳拍戲，但係放飯嘅時候，成班演員喺條街到食霞姨飯盒，呢啲場面你有幾多機會可以睇到？ I'M：佢哋一邊食仲一邊有講有笑～感覺好似同班frd食緊大排擋咁～
靈光：拍戲唔簡單之今日有一場一鏡到底嘅追逐戰，由贊善里跑入後巷再衝出去大街。拍呢場戲好重要，有好多嘢要準備，包括不斷嘅採排，要清場封晒所有死角，演員進出嘅時間要夾得啱啱好，一有穿崩位就要重頭嚟過！   I'M：我哋不斷左閃右避，確保拍到花絮之餘我哋都唔會入到鏡～導演見我哋閃嚟閃去就建議我哋不如入其中一間cafe坐低飲杯野（其實應該係唔想我哋阻住拍攝啫😂～）

-拍攝第五日- 20161028
靈光：拍戲唔簡單之如果冷氣機太大聲，roll 機嘅時候當然要熄冷氣。呢一日嘅拍攝地點係中環其中一間 service apartment，因為工作人員眾多，拍攝環境比較窄，人來人往，一閂冷氣就開始好緊張，即刻流晒汗，又唔可以出聲，好大壓逼感！

I'M：無錯，真係靜到連透氣都唔敢太大聲，製作團隊好好，推出木箱畀我一邊坐一邊拍（其實佢哋係唔想我阻住拍攝乍...）
I'M：身旁嘅工作人員本身拎住個電風扇吹緊佢自己，突然之間吹向我，好感動，焗熱之中亦有一點涼風😌（其實我係咪真係諗多咗？）

靈光：講返拍攝嘅情況，每一個鏡頭好仔細，就連一個熱水壺擺左啲定擺右啲，有無蒸氣噴出嚟都要執。拍完要即刻問收音師姐姐啲聲得唔得，唔得嘅話又要再拍過，一啲都唔簡單！最後 keep 啲咩片段，之後會點剪，就要下（幾廿）回分解喇。

靈光：今日終於同蘇麗珊傾到計。我哋派咗一位同事去主動接觸蘇麗珊，因為呢位同事經常聲稱自己係蘇麗珊朋友，原來係真架喎XD

I'M：好啦～我哋信你喇～同事嘅互相信任就係咁建立嘅～
靈光：多謝蘇麗珊對 Hong Kong Movie 香港電影 嘅支持，佢都係忠實用戶～

I'M：本身想同佢做個訪問同影張相，但係拍攝 schedule 太緊迫，好快又要清場，我哋唯有下次再同佢傾計啦！

（係唔係真係有下次㗎？)