電影熱話

【 MOVIE6 熱話 】個個都睇 3D,唔通個個都想睇 3D? IMAX 決定減少對 3D 電影嘅支援

個個都睇 3D,唔通個個都想睇 3D? IMAX 決定減少對 3D 電影嘅支援

其實唔係個個都想睇 3D,如果有得畀我揀,我都寧願睇 2D。大家都知一張戲飛嘅價錢比舊時貴咗好多啦,而睇 3D 電影就更加貴。不過好多時候所謂嘅 3D 電影,3D 效果最突出嘅部分竟然係字幕。又有啲時候睇 3D 電影唔記得帶或者帶錯 3D 眼鏡,我會埋怨究竟邊一個發明了 3D,我要⋯⋯

記得帶3D眼鏡⋯⋯

有鑑於2D觀影體驗比3D好,IMAX宣佈開始減少對3D電影嘅支援。IMAX嘅研究顯示普遍觀眾傾向想睇2D電影多,而且,雖然有3D版本嘅電影票房成績可能會好啲啲,但扣除晒成本之後,相對上3D為一齣電影賺取嘅利潤根本就好少。越嚟越多導演抗拒用3D器材拍攝電影又或者做3D後製,一嚟製作麻煩,二嚟3D電影未必令觀眾睇得舒服。

《猿人爭霸戰:猩凶巨戰》無3D版

就連大型製作嘅電影都開始唔做3D版本,就好似近期嘅《猿人爭霸戰:猩凶巨戰》、《鄧寇克大行動》等等,都唔需要借助3D做噱頭,票房一樣有好好嘅成績。再舉《魔戒》系列同《哈比人》系列做例子:當年《魔戒》系列只有2D版本,三集全球票房勁收大約廿九億美金;但係去到《哈比人》系列,換咗超高清3D拍攝,唔單止有觀眾覺得睇得唔舒服,未計通貨膨脹,最尾《哈比人》系列嘅全球總票房數字都只係比《魔戒》系列多啲啲,一樣都係大約廿九億美金左右

IMAX VR體驗中心

嚟緊IMAX都會落力支持多啲2D電影嘅放映,例如十月上映嘅《銀翼殺手2049》,IMAX只會得2D版本。逐步減少支援3D,又唔係代表IMAX唔再投資喺新媒體嘅觀影體驗。近期IMAX就好積極發展VR事業,仲喺美國開咗兩間IMAX VR體驗中心,今年推出過《盜墓迷城 Prodigium Strike》虛擬實境體驗,之後仲會同《正義聯盟》合作添。

當然,有啲3D版本嘅電影聽落都仲係覺得好正,亦好值得大家支持,張飛買貴少少都覺得抵,但係真係唔駛吓吓都3D囉,睇得多3D電影都覺得攰啦。

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

You Might Also Like